WILLEMSTAD.- E ekspertonan ulandes ku riba petishon di minister di Kòrsou a bin aki pa kontrolá InselAir riba e parti di seguridat, a bai Ulanda i ya a reportá na gobièrnu di Kòrsou. E loke nan a konstatá ta un tristesa pa Kòrsou i si gobièrnu su wowo no habri awor, nos nunka lo yega na kategoria 1.

EXTRA a papia ku personanan hopi yegá na henter e investigashon di parti di ekspertonan lokal i ekstranhero, relashoná ku e supuesto inseguridat di InselAir.
E ekspertonan a bin di Ulanda riba petishon di gobièrnu di Kòrsou pa trese klaridat den e situashon aki. Gobièrnu ulandes a hasi petishon riba su hendenan pa no biaha ku InselAir pasobra ta un kompania di aviashon ‘unsafe’. Merka tambe a hasi meskos pa su hendenan.

Sinembargo segun EXTRA por a komprondé di nos fuentenan, e resultado di e rapòrt ku e ekspertonan ulandes a traha no ta nada kontra di InselAir. Tur loke e ekspertonan a haña ta un sorpresa agradabel ku serka InselAir, nan a keda sorprendí ku InselAir tabata disponé di tur papel i tur programa ku un kompania di aviashon mester tin i den e kaso aki pa buelonan entre islanan di Kòrsou, Aruba i Boneiru.

Tur buki i tur manual ku nan a pidi, InselAir tabata disponé di dje. EXTRA a komprondé ku aña pasá na novèmber ekspertonan di KLM tambe a bin auditá InselAir. E rapòrt e dia ei di KLM a sorprendé InselAir mes, ya ku den dje a pone vários punto ku segun nan InselAir tabata falta. InselAir a manda karta pa reklamá KLM mes i outoridatnan lokal.

Den e kaso awor, parse ku e ekspertonan ulandes a saka e rapòrt di KLM di aña pasa i for di e rapòrt aki segun EXTRA su fuentenan, tabata kuestioná InselAir. Pero pa nan sorpresa InselAir tabata disponé di tur e dokumentonan i tur programa i manual ku e tempu ei e rapòrt di KLM a bisa ku InselAir no tin.
InselAir, segun nos fuentenan ta kumpli ku tur rekisito pa ta un kompania sigur. E ekspertonan mes no por komprondé dikon e rapòrt ku KLM a traha.

Loke tambe a hala atenshon di e ekspertonan ulandes ku InselAir ta mihó ekipá ku departamento di aviashon mes. Nos fuentenan a menshoná e sistema SMS (Safety Management System) ku InselAir ta traha kuné pero ku departamento di aviashon sivil no tin.

Segun EXTRA su fuentenan, e ekspertonan ulandes lo a traha rapòrt ku a keda entrega kaba na gobièrnu di Kòrsou. I den e rapòrt aki parse ta resaltá e defisiensia na CCAA. Nos fuentenan ku a sigui e investigashon di e ekspertonan ulandes hopi di aserka a splika EXTRA ku gobièrnu di Kòrsou tin un trabou hopi duru ku e departamento di aviashon sivil. InselAir ta kumpli mas di loke CCAA mes ta.

E departamento aki parse no tin hende ni programa pa hasi e kontrol nesesario.
Konkluyendo por bisa ku InselAir ta dispone di tur dokumento i tambe ta kumpli ku e proseduranan nesesario pa ta un kompania di aviashon sigur ‘safe’ (InselAir Kòrsou). I awor ta interesante pa sa kiko gobièrnu di Kòrsou lo bai hasi ku e rapòrt aki, entre otro pa eksihí pa Ulanda hala aden e alerta pa su hendenan no bula ku InselAir entre islanan ABC.

Bron: Extra