WILLEMSTAD,- Segun abogado Eric de Vries di HBN Law Ministerio Públiko ta usa deklarashonnan difamatorio kontra su persona.

De Vries ta reakshoná riba desishon di Ministerio Públiko siman pasá pa pidi Hof pa fiha ku tabatin mal maneho na kompanianan di gobièrnu i pa a base di esaki e kompanianan persiguí esnan ku a kometé e mal maneho aki. E kaso por bai resultá den un kaso penal kontra di e aktornan manera wes Willems a indiká den e resultado final dje Enkuesta Sivil di kompanianan di gobièrnu.

Segun Ministerio Públiko Eric de Vries komo abogado tabata presente den kasi tur ‘desishon dudoso’ ku a keda tuma den e kompanianan Integrated Utility Holding NV (Aqualectra), Curaçao Oil NV i Curoil Gas NV i Refineria di Kòrsou NV durante e periodo di gobernashon di Gerrit Schotte komo minister- presidente di Kòrsou entre 2010-2012.

Segun Ministerio Públiko De Vries ta responsabel pa mal maneho di gobièrnu den e kompanianan di gobièrnu menshoná. De Vries ta splika ku Ministerio Públiko no mag di sinta riba stul di wes. Pasobra korte ta e úniko instansia ku por imponé kondena, no Ministerio Públiko, segun De Vries.

Segun De Vries tur akusashonnan ta difamatorio i no ta basá riba niun prueba.

Bron: Extra