WILLEMSTAD.- Apòstel Orlando “Lando” Balentina(52) ayera a bolbe bin dilanti hues pa un otro akusashon ku e tin den su kontra. E kaso a keda presentá den pro forma pa motibu ku fiskal a bisa ku mester skucha 3 testigu mas.

Balentina ayera a drenta ku mas ánimo kompará ku e promé bes nan, i asta a smail i kinipí wowo ku su fielnan, ku tabata sintá den tribuna. Kos ku promé no a sosodé. E tabata drenta ku su kara règt sin bira wak nunka den tribuna. Korte a tene un konferensia di video ku su abogado mr Harlequin na Ulanda. Den e dagfar aki e ta keda akusá di a kometé aktonan inmoral ku un damsita di 17 aña  riba 3 di febrüari 2013 na Ulanda. E tempu ei e tabata fungi komo mentor di e damsita na e  iglesia Lluvias de Bendiciones na e siudat di Capelle aan den Ijssel. E damsita a hasi denunsia ku e akusado a mishi ku su parti íntimo vários bia, i tabata lag’é hasi sekso oral pa e akusado. E testigunan ku lo keda skuchá ta e denunsiante i su dos amigunan.

Abogado Harlequin a pidi grabashon oudio visual  di e testigunan despues ku nan kaba di wòrdu interogá.  E kaso lo bolbe keda presentá den pro forma dia 19 di mei pa wak e situashon di e kaso i si tur kos ta kla pa e tratamentu na yüni.

Manera ya ta konosí Balentina tin 18 akusashon den su kontra pa aktonan inmoral ku vários menor di edat.   Durante e investigashon a bin  mas denunsia aserka for di Ulanda.

For di un prinsipio e akusado a keda para riba su inosensia. El a bisa ku e ta hasi uzo di su derechi keda ketu i ta laga tur kos den man di su abogadonan. Abogado Harlequin a bisa ku e lo bula bin Kòrsou pa  tratamentu di e kaso. Balentina no tabatin nada di bisa ayera den su último palabra.

Bron: Extra