WILLEMSTAD,- ‘Segun mi hopi kos den prensa lokal a empeorá den e último añanan. E ta konta tambe pa sierto kos den polítiko, komportashon di nos hende den tráfiko, e manera ku nos ta trata nos medio ambiente, ets.’

Asina minister di Salubridat, Medio Ambiente i Naturalesa Suzy Camelia-Römer a bisa ayera riba Dia di Prensa. Segun minister Camelia-Römer esaki tin di aber ku un tendensia komun, ku e ta visibel den nos komunidat.

‘Hopi kos a sali for di man den nos komunidat.’ Segun Camelia-Römer mester restorá órden riba diferente tereno, inkluyendo media di komunikashon. Ayera durante selebrashon di Dia di Prensa algun periodista a splika gobièrnu ku nan ta na fabor di introdukshon di un kódigo di media, ku ta konta ku e manera kon un prensa responsabel ta dil ku tópikonan manera ophetividat, periodismo responsabel, influensia for di polítiko òf mundu empresarial.

Suzy Camelia-Römer ta bisa ku si lo bin for di media mes un inisiativa pa introdusí un kódigo di media, gobièrnu lo kontribuí pa yega na esaki. ‘Na mi opinion esaki tin di aber ku un media di komunikashon, ku meskos ku polítiko, ta na altura ku nan mester hasi esfuerso pa mehorá sierto kos. Pa hasi nan trabou na un nivel mas haltu.’

Suzy Camelia-Römer no ke riba ningun manera stroba libertat di prensa. ‘Pasobra un prensa liber ta hopi importante den un demokrasia. Pero na mesun momentu esaki ta bin ku sierto responsabilidat.’ Camelia-Römer: ‘E responsabilidat ta pa un prensa ku ta kontrolá echonan, duna atenshon na tur partido enbolbí, hasi investigashon. Esaki ta e responsabilidat pa un prensa responsabel. Pero tambe pa polítikonan responsabel. Mi tin kolega ku ta na altura di sierto kos, manera un karta di Parlamento, pero na mesun momentu ta bisa na prensa ku nan no ta altura di nada. Esaki, na mi opinion, no ta parti di un polítiko responsabel.’ E ta urgi pa tur hende wak nan mes den spil i na mesun momentu tur hende hasi un esfuerso pa mehorá e trabou ku nan ta hasi.

Bron: Extra