WILLEMSTAD. – Korte di apelashon ayera 29 di desèmber a  konfirmá e veredikto di Korte di Promé Instansia kontra Miguel Abad kulpabel.  

Hof a haña Miguel kulpabel di asesinato di e hòmber A. Sniphout dia 1 yüni 2015. Korte den Promé Instansia a kondená Miguel, na un kastigu di 9 aña di prizòn, esaki ta nifiká ku nada no a kambia den e kastigu.

Korte Superior (apelashon) tabata kòrtiku den su veredikto, den apénas dos paginá e tribunal ta referí na e kontenido di e veredikto di Korte di Penal di Promé Instansia.

Den luna di mei, Ministerio Públiko a pidi un kastigu di 12 aña di prizòn pa Miguel i pago di un suma di 10.744,91 florin na daño i perhuisio. Despues di a tende tur banda di e medaya, korte a yega na un kondena, pero no manera Ministerio Públiko a pidi.

Hues di Promé Instansia a redusí kastigu p’e akusado, pasobra a tene kuenta ku te víktima Sniphout a hasi avansenan seksual riba e akusado i kual situashon a sali for di man dia promé yüni 2015.

Miguel ta para ariba ku e no a bai serka Sniphout pa kometé niun asesinato, pero ta pa papia tokante un posibel trabou ku e por haña serka e komersiante.

Akinan kos a sali for di man, pa motibu di Sniphout su orientashon homoseksual.  Ora ku Miguel a drenta den e kas, no ta dura mashá ku Sniphout ta ofresé Miguel kos di bebe. Miguel a nenga esaki, i ya akinan e por a mira ku Sniphout su karakter a kambia. Mesora Sniphout a kuminsá ku avansenan seksual riba Miguel. Miguel no a aseptá, i manera indiká el a hinka e víktima ku un kuchú.

Esaki ta loke ku Korte a uni su mes kuné i p’esei a yega na un kondená di 9 aña prizòn i Korte di apelashon a ratifiká esaki tambe.

Den e veredikto no tin nada di aber tampoko di e suma di plaka ku personanan perhudiká a reklamá.

Bron: Extra