WILLEMSTAD.- Djaweps awor 31 di ougùstùs, korte di promé instansia lo bolbe trata kaso di e dòbel asesinato ku a tuma lugá dia 3 pa 4 di sèptèmber aña pasa, na e diskoteka “The Alley ” den Punda.
E biaha aki e sospechoso prinsipal Christefer Martina (26) ta esun ku lo mester presentá dilanti hues, pa responsabilisá su mes pa e akusashon ku Ministerio Públiko tin kontra dje. Martina ta keda akusá di ta esun ku a los e tirunan fatal di kual e dos víktima nan Jurick Hooi di 20 aña i e dama Karoushaney Martina di 22 aña a pèrdè nan bida.
E bewaker D. Frans i e amigu di e sospechoso prinsipal D. Lindeborg, ta esnan ku a keda kondená pa posishon di arma di kandela i komplisidat.
E dama Confesor ku a keda akusá pa Ministerio Públiko di a hiba e tas ku e arma abou bèk pa Martina, a rekobrá su libertat, despues ku hues no a haña ku tabatin sufisiente prueba ku e tabata sa ku den e tas tabatin e arma.
E hòmber R. de Jongh ku tabata huntu ku e dama tambe a keda apsolvé di kulpa.
Segun testigunan tabatin un diskushon entre e grupo ku e víktima Hooi tabata para aden ku Martina. E grupo di e víktima Hooi lo a aserká Martina, di kual a bini un interkambio di palabra.
De Jongh a deklará ku direpente el a mira e hòmbernan a kana bin riba Martina. Martina a bisa nan pa legumai pero nan a dal Martina wanta pa despues nan mira Martina benta abou.
Aki e hòmbernan a kuminsá bati Martina ku skòp i moketa pa despues nan tende tiru ku e konsekuensia nan fatal.
Abogado Blonk ku ta esun ku lo bai defend’é e akusado Martina, a hasi petishon na korte pa rekonstrukshon, dia e kaso a keda presentá den pro forma na mei último.
Segun e abogado, for di e rapòrt di patólogo a sali afó ku e dama víktima a risibí herida di bala parti ariba.
Mirando esaki, e abogado kier a hasi un rekonstrukshon pa wak si por tabatin un senario kaminda bala por a bin tambe di e piso ariba di e diskoteka.
Fiskal Koert a pidi hues pa rechasá e petishon, pa motibu ku por a mira klaramente den e imágennan ku ta fo’i un arma kandela bala tabata sali momento ku a los e tirunan fatal.
Segun fiskal e bala ku a alkansá Hooi a drenta sali bek i alkansá e dama mortalmente.
Mr Blonk a bisa ku no por identifiká su kliente riba e imágennan.
Hues de Kort a ninga e petishonnan di e abogado, i a bisa ku tin indikashonnan fuerte pa tene Martina sera. Esaki abase di entre otro deklarashonnan di testigunan.
Bron: Extra