WILLEMSTAD.- Un karta no apropiá ku a bai demasiado leu, un karta ku no mester a skirbi. Maria Liberia-Peters ta bisa den un reakshon riba e karta ku Hensley Koeiman den su kalidat di lider polítiko di MAN a manda kabamentu di siman pasa pa promé minister demishonario Ben Whiteman.

Komo persona ku a para na kabes di un gobièrnu sentral i ku tabata enbolbí den kosnan i momentonan grandi manera siere di Shell eks-premier Maria Liberia-Peters ta bisa tempu tabatin dos nivel di gobernashon tabata laga gobièrnu insular atendé ku asuntunan ku ta regardá Kòrsou fo’i Ost- te Westpunt anto gobièrnu sentral ta atendé ku entidatnan internashonal. Gobièrnunan saliente semper a atendé asuntunan koriente i mester konsiderá por ehèmpel e karta di entendimentu i negosiashonnan ku Guangdong Zhenron Energy komo algu koriente Maria Liberia-Peters ta bisa.

Ki papel ta duna e ministernan ku entrante djárason ta hura komo parlamentario i ku tin tres luna di tempu pa okupá ámbos kargo sra.Liberia- Peters ta puntra. Akaso ta ferwagt di nan ku nan ta sinta ku man krusa el a agregá. Ta bin aserka ku no por bisa nada ainda riba durashon dje proseso di formashon.

E por kaba relativamente rápido pero e por dura seis luna òf mas manera a yega pasa den pasado, kasualmente un formashon pa un gobièrnu ku signatura di MAN Maria Liberia-Peters a splika. China no ta bai warda seis luna pa kaba e proseso di formashon Maria Liberia-Peters a mustra. Riba e pregunta si den e stadium aki lo no ta mas elegante pa premier Whiteman invitá Hensley Koeiman pa un kombersashon informativo riba e asuntu ku e negosiashonnan ku Guangdong Zhenron e ekspromé minister a kontesta ku un no enfátiko.

Ningun kaminda den ningun buki tin para ku ta Hensley Koeiman ta e próksimo promé minister di Kòrsou, ta asumí esaki pero e no ta para pretu riba blanku. Aki atrobe no mag lubidá ku tabatin un proseso di formashon kaminda a asumí sin mas ken ta e próksimo promé minister pero esaki a hala un banda i manda un remplasante ku a sinta tres luna na timon dje gobièrnu nobo Maria Liberia-Peters a splika. Ta ora formador entrega su relato final Ben Whiteman por invitá su susesor i tur eventual minister pa reunionnan di informashon i no promé Maria Liberia- Peters a terminá bisando.

Bron: Extra