WILLEMSTAD.- EXTRA su informantenan ta papia di iregularidat na ofisina di turismo CTB i ku investigashon ta tumando lugá aktualmente. E investigashon ta kanando dos kaminda, unu di e posibel froude aki i otro di un sèn ku Brasil lo a duna pa karnaval.

E último informe ei lo ta sirkulá riba retnan sosial tambe i parse ku ayera minister enkargá ku turismo a reuní urgentemente riba e dosnan ei.

Trahadónan di CTB ta preokupá ku e situashon i den nan mail nan a haña un sirkulario di gerensia riba e posibel iregularidat ku tarheta di krédito. Un dama ku no tin muchu tempu trahando na CTB parse lo a usa e karchi aki di un trahadó di CTB ku a baha ku penshun i lo a gasta mas di 50 mil dòler.

Trahadónan di CTB ku EXTRA tabat i n kombersashon kuné ta preokupá ku e situashon aki i mas ainda si e sèn lo bin den kaha bek.

Esaki pasobra e ofisina di turismo parse a kita e dama enkuestion for di trabou kaba.

E trahadónan ta kere ku gerensia i òf direktiva di CTB mester hasi denunsia penal kontra di e persona ei, meskos ku lo a hasi ku kualke otro trahadó ku kometé froude den nan trabou. E trahadónan ta sinti ku ta protehiendo e persona enkuestion konsientemente pa motibunan ku e trahadónan a apstené di komentá ku EXTRA.

Tur e dos kasonan, ounke un mas ku otro tin atenshon di minister enkargá ku turismo parse i lo ta keda investigá.

Bron: Extra