WILLEMSTAD.- Djaluna 7 ougùstùs 2017 sentral di polis a haña notifikashon ku tin un tiramentu na Jamaicaweg na altura di un edifisio ku no ta den uzo i ku tin diferente herido.

Na yegada di e promé patruya polisial nan a topa ku un kantidat di persona drumí abou na e sitio indiká i den bisindario.

For di un investigashon preliminar ku polis a realisá na e sitio, nan a haña informashon ku un ratu promé un grupo di hòmber tabata sintá den e balkon di e edifisio i dado momento un outo koló skur a yega na e sitio i un òf mas persona a baha for di e outo i a lòs un kantidat grandi di tiru dirigí riba e grupo di hòmber aki i otro (nan) den serkania.

Despues di e akto aki e outo a kore bai ku velosidat haltu.

Resultado di e tiroteo aki a laga un saldo di kuater (4) víktima (maskulino) ku a fayesé na e sitio mes. Seis (6) otro víktima (maskulino) di respektivamente 26, 28, 31, 34, 50 i 52 aña di edat a haña herida di bala na diferente parti di nan kurpa i a keda transportá ku urgensia pa Poliklínika di hospital pa asistensia médiko.

Tres di e kuater víktimanan ku a fayesé ta identifiká: Ethly Albertus Jr. nasé na Kòrsou 26 sèptèmber 1989; Jose Luis Belen, nasé na Sto. Domingo 7 ougùstùs 1995; Luis Jose Belen, nasé na Sto. Domingo 7 ougùstùs 1995.

Den kurso di dia ta identifiká e di kuater víktima ofishalmente.
Na e sitio polis a haña i konfiská un kantidat grandi di ‘huls’. Dòkter di polis a konstatá morto di e kuater víktimanan.

Riba òrdu di Fiskal di Ministerio Públiko a konfiská e kurpanan sin bida i un vehíkulo ku tabatin na e sitio ku perforashon di bala pa mas investigashon. Mas lat a drenta informashon ku na altura di Shut tin un vehíkulo ku probablemente e sospechoso (nan) a uza na e asesinatonan na Jamaicaweg na kandela. Polis a bai na e sitio i a konstatá ku en bèrdat tin un vehíkulo na kandela. Despues ku a paga e kandela polis a konfiská e vehíkulo pa mas investigashon.

Bron: Extra