WILLEMSTAD.- Trahadónan di Paradise Plaza Casino te djadumingu awor lo ta sin trabou. Pasobra e kasino ta dal su portanan sera. Den wikènt tras di lomba, e trahadónan a haña un sirkulario ku lo sera porta dje kasino ku ta ubiká riba Brionplein i ta pertenesé na Hotel Howard Johnson.

Sindikato HORECAF no por hasi hopi p’e trahadónan, pasobra nan no tin afiliashon na e sindikato. Pero esei no ta kita ku e sindikato por duna e trahadónan konseho kon pa kana i haña nan derecho. Esaki ta loke ku señor Kenneth Valpoort di HORECAF a duna di konosé na EXTRA.

Valpoort a bisa ku el a haña yamada di algun trahadó, ku a bisa ku djadumingu awor nan lo ta riba kaya sin trabou. El a konsehá e trahadónan pa bai e departamento di Arbeidszaken, pa nan haña splikashon, i pa sa tur trámitenan ku nan tin di hasi pa haña nan derechonan.

HORECAF no tin representashon den e kasino, i no sa kuantu trahadó tin. Den kaso ku tòg nan no keda kla, por akudí na HORECAF ku lo no keda sin splika nan e kamindanan pa kana.

E loke ta fèrfelu den e kaso aki ta segun Valpoort, ku el a komprondé dje trahadónan ku e mènedjer dje kasino no ke duna kara na trahadónan. Trahadónan ta desampará. Tambe e sindikalista a komprondé ku Gaming Control Board (GCB) a laga sera e kasino.

E sla riba esaki ta ku e kasino ta di e italiano detené ayera mainta na St. Maarten, Francesco Corallo. Corallo ta amigu di Gerrit Schotte, lider polítiko di MFK.
Valpoort a bisa ku e trahadónan tin derecho di kobra salario, sesantia i ‘opzeggingstermijn’. Esnan ku tin dianan di fakansi tambe tin di keda paga. Tur esakinan tin di keda reglá i e kasino no por dal porta sera sin mas. E kasino mester kumpli ku e trahadónan, Valpoort terminá bisando.

Bron: Extra