Hulanda a enfatisá importansia di un konferensia. Davelaar: ‘Na Sint Maarten i na Kòrsou den aña 2016 na kasi mesun temporada tabatin elekshon pa skohe un parlamento nobo. Esei a nifiká ku dia 2 di novèmber a sinta parlamento nobo di Kòrsou. E siman mes tabatin e promé ‘video conference’ ku e paisnan di Reino a papia tokante preparashon di IPKO. Esei a pone ku nos mester a informá partnernan den reino ku nos a kere pa posponé e IPKO ku mester a bin na Kòrsou.
Na e momentu ei no tabatin un komishon nobo pa asuntunan den reino di nos Parlamento. Den e ‘video conference’ Hulanda a ekspresá netamente nan deseo pa tòg laga bai dor e IPKO. I pa e IPKO aki a bira un IKPO informal i nos lo no tin un lista di akuerdo manera ta normal. Pero e IPKO aki a sirbi mas pa un momentu pa sera konosí otro.’
Segun presidente di Parlamento Humphrey Davelaar ‘tòg nos a prepará temanan ku tabata pendiente i nos a hiba diskushon i debate riba e temanan ei. Preparando pa e IPKO ku lo tuma lugá den mei òf yüni e aña aki na Hulanda. Durante e konferensia ei lo tin un lista di akuerdo.’
Davelaar: ‘Nos a hasi bon uso di e tempu di djamars, djaweps i djárason. A pasa diferente temanan. Komo Kòrsou nos a prepará diferente presentashon. Manera desaroyo den haf i tambe un bishita den haf i tambe presentashon di proyektonan di energia alternativo. Nos a bishita hospital nobo i a duna un presentashon tambe riba desaroyo di hospital nobo. Nos a prepará tambe un presentashon riba desaroyo di Oostpunt.
I tambe nos a por bishitá Oostpunt. Pero lamentablemente awa seru a kai hopi duru, ku no a permití nos bishita Oostpunt den su totalidat. Nos tabatin un bishita tambe serka Vertegenwoordiger di Hulanda, na unda miembronan di delegashonnan informal por a papia ku otro outoridatnan, manera ministernan. Djaweps anochi tabata un presentashon riba shen aña di refineria na Kòrsou na NAAM, kaminda tabata un eksposishon.’
Bron: Extra