WILLEMSTAD.- Gassan Dannawi i Yaël Plet ayera a aseptá nan posishon di parlamentario nobo pa partido MAN den kombersashon ku presidente di Konseho Supremo Elektoral (KSE) Raymond “Pacheco” Römer.
Te ainda nan no ta huramentá. Pa partido PNP Henny Reinilia a splika ku e lo aseptá su posishon. Pa partido PAR Curtley Obispo i Stephen Walroud lo aseptá nan posishon. Awe Sherwin Leonora i Melvin “Mac” Cijntje lo reuní ku presidente di Konseho Supremo Elektoral (KSE) i aseptá nan posishon pa Pueblo Soberano. Asina presidente di KSE Raymond “Pacheco” Römer a splika EXTRA ayera.
Esaki ta nifiká ku awe tur parlamentario nobo ta konosí. Manera ta konosí dia 23 di desèmber 7 parlamentario a keda huramentá komo minister. Ku esaki parlamento di Kòrsou a keda ku 14 parlamentario. Den partido MAN a kuminsá un disputa ken por bira e siguiente parlamentarionan, pasobra promé ku elekshon partido MAN a laga tur hende riba lista di elekshon firma un akuerdo ku pa e kandidatonan por drenta parlamento, sekuensia no ta importante pero kantidat di voto. Ku esaki lo nifiká ku despues di Hensley Koeiman, Kenneth Gijsbertha, Giselle Mc William, Elsa Rozendal i Gassan Dannawi (ku ta number 1 te 5 riba lista i tambe e 5 hende ku mas voto) number 10 riba lista, ku ta Wimberto Hato, mester sigui, ku a haña 226 voto. Ayera a bira kla ku number 6 riba lista, ku ta Yaël Plet ku a haña 134 vota dia 5 di òktober, lo drenta den Parlamento pa partido blou.
Bron: Extra