WILLEMSTAD.- Ayera mardugá pastor Carlos di Misa di Montaña a keda ku sustu atras, despues ku un atrakadó a sorprendé den su kamber.

Segun informe ku EXTRA tin ta indiká ku tabata den kareda di 4’or di mardugá na momentu ku pastor a tende un zonido duru na su porta di kamber, pa despues esaki bula habri i un hòmber aparesé ku un kuchú den man riba dje. E hòmber a pidi pastor sèn. El a keda ripití ku e ke sèn.

Esaki tabata sosodé, miéntras e tabata dirigí e arma riba pastor. Investigashon ta indiká ku e hòmber lo a pasa na otro portanan di kas di pastor pa wak si esakinan ta habri. Despues e ta yega na unu ku si e por a habri, i asina el a drenta kas. Tambe e malechor su kara tabata tapá. El a listra den kas i despues pa drenta kamber di pastor.

Tambe tabatin kámara na kas di pastor, i e malechor aki lo a bira un dje kámaranan pa no kapt’e. Sinembargo tabatin mas kámara ku a graba e sospechoso ora e ta drenta kas di pastor via di un dje porta nan. Normalmente pastornan no sa tin sèn den kas, pero hustamente e dia promé tabatin pago di santana ku a tuma lugá, i pastor no a logra di hiba sèn banko.

E plaka aki tabata den kas i ku pastor a hañ’e obligá di dun’e. Pastor a indiká di a keda ku trouma di loke a pasa i ta algu ku e lo tin di bai biba kuné. Esaki ta di dos pastor atraká. Aña pasa a atraká pastor di Jandoret ora el a yega kas i awor ta pastor Carlos. Sigur un falta kompleto di rèspèt pa pastor. Ta di spera ku pronto polisnan por pone man riba e malechor aki, despues ku publiká e grabashon di dje.

Bron; Extra