WILLEMSTAD.- Ayera durante di oranan di atardi e tim multidisiplinario formá pa MEO, BAB, Ministerio di Salubridat i tambe vários unidat di Kuerpo Polisial di Kòrsou a tene dos entrada hudisial kombiná ku kontrol na dos diferente bar.

Durante di e kontrol aki a kontrolá entre otro pèrmit identifikashon òf pèrmit di empleadonan. A bai primeramente na Sabor Uniko Bar ku ta keda na Saliña.

Aki a konstatá ku e propietario tabata disponé di papel di kámara di komersio pero no tabatin pèrmit pa por operá un kushina ni tampoko pèrmit pa benta di alkohòl.

Tambe a konstatá ku propietario ta hür kamber ku diferente dama, kual no ta algu legal.

Aparte di esaki tambe a deskubrí dos empleado indokumentá.

Despues a bai na Ñaña Snack ku ta keda na Maishiweg na Mahuma. Na yegada di outoridatnan a start un korementu formal tur banda. Esaki a konkluí den un akshon eksitoso ku detenshon di 17 persona femenino indokumentá.

E establesimentu mes no ta disponé di pèrmit pa benta di alkohòl ni tampoko pèrmit pa por operá un kushina.

Aparte di esaki a konstatá un situashon no apropiá pa ku trato di e empleadonan.

Ambos establesimentu a keda será i lo por habri bèk na momentu ku propietarionan pone tur kos na òrdu bèk.

Bron: Extra