WILLEMSTAD. – Djabièrnè awor Korte di Apelashon (Superior) lo duna su punto di bista den e kaso penal ku a haña e nòmber ‘Babel’ kontra di Geritt Schotte i Cicely van der Dijs.

Manera ta konosí Korte Penal di promé instansia a kondená e akusado Schotte na 3 aña kastigu di prizòn i van der Dijs na 18 luna prizòn di kua 9 luna kondishonal. E defensa formá pa abogadonan Knoops, Knoops-Hamburger, Baaijens i Vaders a hiba huntu un total di 124 página di defensa, pa konvensé e tribunal ku e promé hues ku a trata e kaso, no a evaluá tur e puntonan ku ta kondusí na apsolushon di e akusadonan. Es mas e biaha aki e akusadonan a duna amplio deklarashon di e loke ku nan ta keda akusá di dje.

Esaki a pone ku e defensa a pleita pa primeramente libertat pa tur e dos akusado. Punto prinsipal den esaki ta ku e plaka ku ta sospechá e akusadonan di a laba, no ta plaka di fuentenan kriminal. Si te na ora tabata plaka di fuente kriminal, e alkoladonan no ta den e posishon di lo tabata sa esei tampoko. Banda di esei a akusá Schotte i van der Dijs pa falsifikashon di dokumentu i tambe tabata den poseshon di aparatonan pa stroba transmishon di telefòn (jammers) etcetera.

Manera ya menshoná, kontrali na e prosedura den korte di promé Instansia, Schotte i van der Dijs a duna un splikashon amplio di tur loke ku nan ta keda akusá di dje. Esaki tambe a keda sostené pa e defensa di e kuater abogadonan kaminda ku nan ta referí riba puntonan kardinal den e “dossier” i rapòrtnan ku ta forma parti di e “dossier”. Pues no ta basá solamente riba palabra, pero puntonan skibí den e “dossier”.

Esaki ta nifiká ku e “dossier” tin tur e pruebanan ku por kondusí na apsolushon di e dos akusadonan. Esaki ta nifiká ku no tin prueba konvisente kontra di Schotte i van der Dijs, sigur no konforme e akusashon ku tin riba mesa. Esaki ta kondusí na solamente un punto, libertat pa tur e dos akusadonan, asina e abogadonan a enfatisá den nan nota di defensa. Mañan djabièrnè lo bira un dia interesante.

Bron: Extra