WILLEMSTAD.- Ningun momentu so sra. Melvina Cecilia a ser interogá dor di RST riba nada di FDRS, sino ku outoridatnan en bèrdat tabata na su kas pero pa henteramente otro kos ku no tin nada di haber ku su persona.
Esei EXTRA por a komprondé for di un kombersashon ku nos a sostené ku e propio sra. Cecilia ayera nochi. T’asina ku un matutino (ku no ta EXTRA) lo a publiká riba su portada ku RST lo a presentá na kas di e eks parlamentario i ku nan lo a interogá esaki riba henter e asuntu di Fundashon pa Desaroyo i Responsabilidat Sosial kual a ser lantá ku tur bon intenshon pa yuda nos hóbennan pero rondó di kua tabatin tantu diskushon algun tempu pasá.
Segun sra. Cecilia, e no por komprondé kon por tin hendenan asina iresponsabel òf di mala fe empleá pasobra opviamente tabata algu ku nan a inventá sea pa hasi daño na su persona òf pa sensashon. Finalmente sra. Cecilia a deklará na EXTRA ku e lo entamá e pasonan apropiá kontra e medio na su debido tempu.
Bron: Extra