WILLEMSTAD.- Resientemente un grupo di empresa huntu ku gobièrnu i tambe CPA a firma un deklarashon di intenshon ku ta importante pa pais.
E deklarashon di intenshon aki ta enserá den liñanan grandi ku gobièrnu ta traspasá sierto terenonan den haf pa asina por desaroyá aktividatnan marítimo i di investigashon ku ta di sumo importansia.
Pronto tambe lo por tin firmamentu di un otro akuerdo ku ta resultado di e akuerdo di intenshon aki. Den e akuerdo ei Carmabi tambe lo ta partísipe i lo enserá aktividatnan den kual lo bai usa fasilidatnan na Kòrsou pa hasi investigashon riba organismonan bou di laman. E akuerdo di intenshon aki a ser firma entre gobièrnu (Minister Suzy Camelia- Römer) i empresanan Chapman Shipping, Dioro Enterprises i CPA.
Na e okashon aki sr. Dutch Schrier, direktor i gerente di Chapman Shipping a splika ku un proyekto manera esaki sigur lo ta importante ya ku lo bini aki na Kòrsou un sentro sientífiko di investigashon. I esaki na nivel internashonal lo hasi Kòrsou un pais bon konosí. Kòrsou lo bai riba un plano mas haltu, ya ku investigashonnan manera esaki ta ser hasi solamente na algun parti di mundu. Chapman Shipping tin un barku spesialmente ekipá pa sali riba laman ganchu pa hasi e investigashonnan huntu ku sientífikonan internashonal.
Manera ta konosí, Seaquarium ta konta kaba pa hopi tempu ku un supmarino ku por bai na un profundidat di 300 meter. E ta trahando kaba ku algun di e sentronan sientífiko di mas prestigioso na mundu.
Segun sr. Schrier, un hende lo puntra su mes dikon nan ta bini aki na Kòrsou? El a splika ku, tal bes hopi hende no sa pero aki na Kòrsou nos tin e habilidat di bai kaminda otronan no por yega, i esei ta pa motibu di e supmarino ku e ta operando. Kòrsou ta trahando kaba ku diferente instituto manera Smithsonian, Instituto Merikano di Kanser, Universidat di Wageningen na Ulanda, universidatnan na Oustralia. I e sientífikonan i profesornan dje universidatnan ariba menshoná ta bini aki na Kòrsou i nan ta hasi uso di e supmarino i tuma muestra di espesienan na profundidat di te ku 300 meter. Kòrsou ta un dje tiki kamindanan na mundu unda ta hasi e tipo di investigashonnan aki.
Bron: Extra