WILLEMSTAD.- Awe Kòrsou ta drenta su di tres dia ku e kódigo hel ku servisio meteorológiko a emití i ta keda na vigor. Esta ku kalor eksesivo i laman brutu ta keda persistí riba nos isla awe tambe. Esaki ta debí na pasada di orkan Irma.

E situashon general di wer ta indiká ku durante di próksimo 24 ora, debí na un oumento di humedat, algun nubia lo forma de bes en kuando riba nos region i lokalmente lo kai algu di áwaseru riba nos isla. Dor di presensia di orkan Irma banda di Islariba, diferensia den preshon di aire den nos region lo ta chikitu.

Esei ta pone ku bientu lo keda suak durante di próksimo dianan. Esaki den kombinashon ku temperatura haltu, solo fuerte i aire húmedo ta pone ku e kalor lo keda sofokante. P’esei ta pidi tur hende pa tene kuenta ku e kalor eksesivo aki (Kódigo Hel). Naturalmente ta rekomendá pa no hasi muchu ehersisio físiko espesialmente durante di dia.

Kondishon di laman lo ta trankil te moderá ku altura di ola di 1 meter òf ménos (3 pia òf ménos). Resake lo sigui afektá prinsipalmente kosta nort di Kòrsou i esaki por okashoná laman brutu na e kosta en kuestion. Un súplika na usuarionan di laman i espesialmente piskadónan i otro okupante di boto chikí pa tene kuenta ku esaki (Kódigo hel).

Orkan Irma ta sigui komo un orkan sumamente peligroso di kategoria 5 i ta pasa riba e parti nort di “Virgin Islands” den un direkshon wèst-nortwèst. Tormenta Tropikal José a desaroyá ayera atardi den un orkan i tabata situá riba parti sentral di Oséano Atlántiko i ta move den direkshon wèst. Tormenta Tropikal Katia ayera tardi tambe a desaroyá den un orkan i ost di “Tampico Mexico”. Ningun di e tres sistemanan aki ta un menasa pa Kòrsou, pero Servisio Meteorológiko Kòrsou lo sigui vigilá Irma i José ku atenshon.

Bron: Extra