WILLEMSTAD,- E hóben Arnell Salsbach (25) a haña su libertat ayera, despues di a keda akusá pa posishon di arma di kandela i menasa ku arma.
Esaki pa motibu ku hues no a haña e akusashonnan probá.
Hues a relatá ku dia 1 di yüni último a drenta un tep na polis, ku patras di Jo Barbershop na seri Pietermaai, tabatin problema den un grupo di hòmber un di nan ku karson blou lomba sunú a menasá un otro ku arma di kandela den su man.
Mesora polisnan a akudí na e sitio i na nan yegada nan a mira e hòmber ku e mesun deskripshon kore bai. Un otro patruya ku tambe a kore yega a mira un Kia Rio blanku sali bai sospechoso.
Segun e agentenan e loke a hala nan atenshon tabata ku e shofùr a hisa velosidat ora el a tuma nota di polis i no a para na e krusada pa duna preferensia.
Esaki a pone ku e polisnan a start un persekushon i a duna òrdu na e shofùr pa para e vehíkulo.
Segun un verbalisante, el a mira tambe ku ora e shofùr a habri e porta, e tabatin un arma di kandela den su man.
E shofùr djis despues ta kore dal den un otro vehíkulo i baha kore bai ku e arma den man.
Dado momento polis a los un tiru di atvertensia di kual e hòmber a benta e arma abou i sigui kore. Polis a konfiská e arma di kandela i kuminsá ku un búskeda di e hòmber sospechoso.
E agentenan a haña e akusado den un kas na Monte Verde kaminda el a bai skonde i a detené mesora.
Durante di e huida e hòmber a haña algun kòrta – di algun zim ku tabatin den e área, na su pòls drechi i na e parti abou di su brasa robes. Polis a transport’é pa poliklínika di SEHOS pa tratamentu médiko. Ayera Salsbach a ninga di tabatin un arma di kandela den su man. El a bisa ku e tabata e shofùr di e Kia. Segun Salsbach ora el a mira polis el a hisa velosidat pa motibu ku e ore’i el a mira e arma den e outo.
El a konta ku e outo ni e arma no ta di dje.
Segun e akusado ta di un brò di fam Martina ku aworakí a bai Ulanda i no sa nada di dje.
El a splika hues ku ora el a baha kore e no tabatin niun pistol den su man, pero su telefòn.
El a duna di konosé ku el kai den pániko p’esei el a kuminsá kore.
Fiskal ta haña e akusashon probá mirando kiko e agentenan polisial a relatá. Segun fiskal 4 agente a firma e prosèsverbal ku nan a mira e akusado baha kore bai ku e arma.
Abogado Marije Vaders den su defensa a bisa ku ta imposibel ku e 4 agentenan a mira, siendo ku 2 di nan no tabata tei na e sitio i e otro a keda para kaminda e arma tabata benta abou.
Segun Vaders ta un verbalisante so a bisa di a mira su kliente ku arma i no por probá esaki.
Hues den su desishon a duna e abogado rason. Segun hues no ta muchu kla pe kiko e loke ku tabatin para den e prosèsverbal i ku e tin duda den esaki.
Tambe hues a bisa ku no por probá e akusado tampoko pa e menasa pa motibu ku no tin nada ku ta sostené esaki.
Hues mirando tur esakinan no a haña niun motibu pa sigui tene e akusado sera i ta dun’e su libertat inmediatamente.
Bron: Extra