WILLEMSTAD.- Te na momentu ku EXTRA a bai imprenta awe mardugá 1’or, e resultado di elekshon na Aruba tabata 9 asiento pa AVP, 9 asiento pa MEP, 2 pa POR i 1 asiento pa RED. Esaki manera tur kos ta indiká lo bai bira un gobièrnu di koalishon, kontrali di loke Aruba a konosé último gobernashon.
Pueblo di Aruba a bai urna ayera ounke un poko desepshonante pa gobernantenan ya ku e kantidat di hende ku no a bai vota ta hopi mas haltu ku loke a konosé den último añanan. Normalmente Aruba su porsentahe di hende ku no ta bai vota ta no mas ku 15% pero ayera esaki tabata mas ku 35%. Sigur motibu pa averiguá ta dikon e malkontentu den pueblo pa no bai vota.
Pa loke ta e resultado di elekshon EXTRA mester bisa ku partido AVP ku tin 12 asiento a bai atras den asiento. Nan te na momentu ku EXTRA por a sigui esaki a haña 8 asiento mas un restzetel.
Partido MEP si a subi di asiento, logrando 7 asiento i dos restzetel.
Lider di MEP Evelyn Wever Croes a bisa ku nan ta satisfecho ku e resultado. E promé konklushon ta ku nan a bai dilanti. Nan ta e partido ku a bai mas dilanti siendo AVP a bai atras hopi.
Partido POR di Otmar Oduber lo bai bira e partido i persona mas interesante den e próksimo simannan ku 2 asiento. E lo bai bira e yabi pa forma un gobièrnu nobo pa pais Aruba.
Otmar Oduber tabata sumamente kontentu ku e resultado i a bisa ku e resultado ei ta un indikashon bon kla ku e pueblo a rechasá korupshon den gobièrnu. Partido POR a lanta 8 luna pasá i den e tiki lunanan ei nan a logra 2 asiento (te na ora nos a bai imprenta). Oduber a bisa ku pueblo ke kambio.
Mas aleu partido RED i Ricardo Croes a haña un asiento.
EXTRA a sigui elekshon di Aruba na promé lugá via di Noticia Cla. I nos tin di gradesí nos gran amigu Tito Lacle ku e tremendo kooperashon aki. Un tremendo trabou.
Mas anochi nos a siguié via di Tele Aruba i nos mester bisa tremendo trabou di Ivo Yanez. Un hòmber so a dirigí henter e programa, tresiendo e resultadonan, dunando alabes análisis, pasa di un kolega pa otro riba kaya ku tabata dunando informashon di e situashon riba kaya. Algu sorprendentemente i pa no papia mes di e presentashon, teknologia na nivel hopi haltu di Tele Aruba.
Bron: Extra