WILLEMSTAD.- No ta solamente e plaka di supsidio ku gobièrnu ta duna na e organisashon ku ta organisá karnaval, pero gobièrnu ta hinka miónes den karnaval, ta loke ku minister Sra. Marilyn Alcalá-Wallé a duna di konosé na prensa. El a bisa ku ainda gobièrnu ta sinta ku herensia for di 2014.
Pa aña 2018 Fundashon JAG ta organisá karnaval i a haña un supsidio di 350 mil florin di gobièrnu.
Segun Sra. Alcalá-Wallé banda di e plaka aki gobièrnu ta hinka miónes i por mir’é den kantidat di overtaim ku polis, brantwer, e tim di GMN ku ta kontrolá durante di karnaval, ta kobra.
Gobièrnu no ta saka nada for di karnaval, i hasta e plaka di prekario ta bai pa e gruponan di karnaval.
Banda di esaki ainda gobièrnu ta sintá ku herensia di karnaval di 2014. Hopi hende a keda perhudiká dor di organisashonnan di karnaval i di kual nan no a haña pago pa trabounan ehersé.
“Hopi biaha organisashonnan ta laga hopi di deseá p’esei nos a bisa ku despues di karnaval 2018 ta evaluá Fundashon JAG. I si tur kos ta na òrdu, nan ta keda enkargá ku karnaval na 2019 tambe.”
Mas aleu Sra. Lisette Velden-Sambo direktor di sektor di kultura a bisa ku un organisashon no por haña un presupuesto pa traha kuné, ta surpasá esaki, i gobièrnu tin di paga esaki.
“Semper ora tin reto ta bisa e organisashonnan pa bin papia, negoshá ku gobièrnu. Pero hopi organisashon ta traha outónomo. Awor gobièrnu ta mas sabí, i a disidí ku e organisashon nobo aki ku ora tin reto, ta bin bèk na mesa ku gobièrnu pa determiná un ke otro promé ku hinka kurpa den debe”, ta loke Sra. Velden-Sambo a indiká.
Bron: Extra