WILLEMSTAD. – Dia 22 di desèmber 2016 polis a haña un kurpa sin bida di e hòmber Jdesse Boerenveen (40) na Gooimeer na Almere. Jdesse tabatin algun dia pèrdí promé ku polis a lokalisá su kurpa. Jdesse a nase na Sürnam i no tin trabou i ta biba di yudansa di otronan. 

Despues el a haña un lugá pa biba serka un konosí, pero un dado momentu Jdesse no a regresá kas. Dianan ta pasa i e konosí a pone polis na altura di e pèrdida di Jdesse.

Akinan a reportá Jdesse komo pèrdí. E loke ku tur su konosínan tabata teme pe a bira mas serio, ora ku direpente a sali un video riba Internet kaminda ku por a mira Jdesse den un situashon no kómodo i dos hende ku tabata menasá. Tabata dos hòmber i un hende muhé.

Un kos tabata konosí di Jdesse ta ku e tabatin debe. El a hinka su kurpa den problema serio ku debenan ku el a krea tur kaminda i no por a sali for di esakinan, pa e simpel echo ku e no tin trabou fiho.

Polis a traha riba e video i a logra saka afó na unda e video ei tabata grabá ku kámara di seguridat. Tabata den ofisina di un garashi di outo, kaminda ku klaramente tabatin hopi preshon riba Jdesse pa e loke ku e tin na debe.
Polis su investigashon a dirigí nan na e playa Gooimeer i einan a bin haña e kurpa di Jdesse sin bida.

Un konosí ku a mira Jdesse e anochi promé di desèmber na stashon di trein na Almere Muziekwijk i a tuma nota di dos hòmber koló skur ku tur probabilidat ta antiano i tabata papia ku un asento.

Polis ta logra arestá un di e hòmbernan, pero e hòmber aki no ta papiando i polis no por saka afó ta ken e otro dos hòmbernan ta. E hòmber ku polis ta kere ku ta un antiano tin kabei rasta.

Polis ta pidi ken ku por sa algu òf a tende algu di e kaso aki pa duna informashon di loke ku nan tin, p’asina logra solushoná e kaso aki.

Bron: Extra