WILLEMSTAD.- Minister Presidente Gilmar Pisas a deklará ayera 20 di aprel ku Fundashon Blue Economy Curaçao ta ligá na un kompania privá lokal.
Ta bon pa splika ku Blue Economy ta un konsepto internashonal ku NO tin nada di aber ku niun kompania privá lokal. Ku e ponensia ei Minister Presidente ta bolbe hasi meskos ku dia el a bisa Kòrsou ta bankarota. E ta mustrá ku e no sa kiko e ta papia.
Blue Economy
Suzy Camelia Römer lider di PIN ta bisa ku base di Blue Economy ta den naturalesa kaminda funshonamentu di eko-sistemanan ta keda apliká pa medio di inovashonnan i ideanan inovativo riba sistemanan ekonómiko. Den Naturalesa no tin un aktor dominante, no tin shushi, “waste” ni no tin desempleo. Tin diferente aktor i tur ta kontribuí.
E persona ku a introdusí e sistema aki yama Gunther Pauli, e ta di Bèlgika i 20 aña pasá Nashonnan Uní a pidié pa desaroyá e konsepto aki pa asina yuda krea un modelo nobo pa desaroyo di nashonnan ku ta inklusivo, integral, inovativo i ku ta funshoná! Despues di hopi investigashon sientífiko den e último 13 añanan tin mas di 100 inovashon, 1000 proposishon di negoshi i mas di 100 mion kupo di trabou a keda kreá rònt mundu. E la yam’é Blou pa distinguié for di Green!
Na Kòrsou tin un grupo di hende ku tambe ta kere den e konsepto aki i a enkontrá otro i ta traha huntu pa e konsepto aki keda introdusí i implementá na Kòrsou. Nan lo sigui traha pa esaki bira realidat.
Koló blou di Partido Inovashon Nashonal
Konseho Supremo Elektoral ta asigná koló na agrupashonnan polítiko i pa e elekshon di dia 28 di aprel próksimo, Partido Inovashon Nashonal a risibí e koló blou kla. PIN tabata ke koló Turqoise, pero esei no tabata posibel mirando ku kolónan a keda determiná pa Konseho Supremo Elektoral kaba. E kolo Blou Kla ta pas masha bon ku nan vishon pa desaroyá Blue Economy komo un método inovativo i integral pa desaroyo ekonómiko aki na Kòrsou segun sra. Camelia Römer.
Nifikashon di koló blou
Blou ta koló di shelu i laman. E ta asosiá ku profundidat i stabilidat. E ta simbolisá konfiansa, lealtat, konosementu, seguridat, inteligensia, fe, bèrdat i spiritualidat. E ta bon pa mente i kurpa i ta duna un efekto kalmante. E ta òrdu i speransa pa Kòrsou.
No ta nada straño ku hopi hende o empresa lo sea usa koló blou òf tin e nòmber blou den nan nòmber komersial. Un sondeo kòrtiku a demostrá ku tin 370 empresa registrá den registro di empresa di Kòrsou ku ta kuminsá ku e palabra Blue! Partido Inovashon Nashonal ta masha kontentu ku su koló blou kla!
Bron: Extra