WILLEMSTAD.- Nos ta preparando pa drenta 2017, un aña ku nos ta bai topa ku masha hopi bon intenshon, speransa i konfiansa. Konfiansa den futuro i konfiansa di nos un, den otro, ta sumamente importante, pasobra konfiansa ta loke ta tene nos komunidat huntu, konfiansa TA e salbabida riba kua nos sosiedat ta drif.

Esaki ta loke ku gobernadó sra. Lucille George-Wout a trese dilanti den su diskurso di Pasku na komunidat.

Mas aleu gobernadó a bisa ku sin konfiansa ta imposibel pa un sosiedat funshoná, pa no papia mes di su posibilidat di por sigui desaroyá mas aleu. Konfiansa t’e fundeshi di tur komunidat, ke men di esun di nos tambe. Kaminda tin falta di konfiansa, deskonfiansa ta lanta kabes, ta mustra e banda robes di e mesun medaya.

Lamentablemente, meskos ku na otro partinan di mundu, falta di konfiansa serka siudadanonan tambe i na medida kresiente, ta klaramente visibel.
Investigashon ku Ofisina Sentral di Senso a hasi resientemente, ta mustra ku siudadanonan di Kòrsou mas i mas ta pèrdiendo fe den demokrasia. T’asina ku un di entre kuater persona so ta indiká ku nan ta interesá den polítika. Ku esei nos ta nota ku e abismo proverbial entre siudadano i polítika, lamentablemente ta mas grandi ku nunka. Pero e malkontentu akí no ta konta pa polítika so. E konfiansa den otro institushonnan manera gobièrnu, prensa, sindikato i asta den sistema hudisial tambe ta abou.

Preokupante ta ademas, ku e konfiansa entre siudadanonan un ku otro tambe a mengua. Sifranan ta mustra ku ta un di entre tres hende ta konsiderá ku mayoria hende ta di konfia. Kaminda ántes por a sali bai hasi rospondi sin problema, sin nodi di sera port’i kas, realidat awendia ta otro. Ku e desaroyonan akí, Kòrsou ta sigui un kurso ku na mas lugá na mundu hende ta mira. E rasonnan pakiko e konfiansa ta bayendo atras, no ta fásil pa definí.

Mas aleu gobernadó a sigui bisa ku ta sumamente kla sí, ku hopi hende ta haña ku por mihó i ku mihó mester por. Pa por restourá e konfiansa violá, ta di gran importansia pa rekonosé kon esei a sosodé. Mester evitá ku ta sigui bira lomba pa e institushonnan i pa otro. No mester pèrdè nos mes tampoko den negativismo, sino ser mas honesto ku otro, purba generá ekspektativanan realístiko, aktua di forma transparente i kisas mester pone mas énfasis riba sentido síviko i riba interes general na lugá di riba desaroyo individual.
Huntu mester aspirá na mustra sinseridat den e manera di anda…, den motibu- i e metanan ku ke logra.

Anto den e esfuerso akí no mester mira otro hende so, sino mira nos mes tambe. Ta klaro ku institushonnan t’ei pa sirbi komunidat, pero kada siudadano tin enfátikamente su propio responsabilidat ora ta trata di preokupashon pa kuido di nos sosiedat. Konfiansa tin di bini di dos banda, gobernadó a terminá bisando.

Bron: Extra