WILLEMSTAD. – Petishon di eks Minister di Finansa sr. George Jamaloodin, ku tur probabilidat lo keda tratá e siman aki. Kontrali na e loke ku Hues Komisario ta pretendé, esta ku e persona ku a hasi e petishon mester ta presente den korte pa e keda skuchá, abogado mr. Everett Wilsoe ku tin e interesnan di Jamaloodin na su enkargo, a splika ku niun kaminda no tin nada pará den lei ku tin un asina yamá “verschijningsplicht”.

Pues e tendementu por tuma lugá di un otro forma tambe i esei lo bai sosodé.

Siman tras di lomba Hues Komisario mester a trata e petishon di Jamaloodin, konforme artíkulo 56 di Kódigo Penal, pa pone un fecha pa sera e investigashon ku tin den su kontra den e kaso Maximus. Inisialmente Jamaloodin tabata ke a haña un kontesta promé ku elekshon di dia 30 di sèptèmber benidero, p’asina e chèns tei ku e por ta ministeriabel atrobe, si a kaso hasi un apelashon riba su persona.

E kaso na dos okashon a keda suspendé, pa motibu ku Hues Komisario ta di opinion ku den lei tin skibí ku e persona ku a hasi petishon mester keda skuchá personalmente, esaki ta a base di artíkulo 56.

Abogado Wilsoe a duna di konosé na EXTRA ku en bèrdat lei ta bisa ku esun ku a hasi petishon mester keda skuchá, pero niun kaminda den e lei no ta hasi menshon ku e persona mester tei personalmente.

P’esei, Wilsoe lo manda un karta awe pa Hues Komisario, kaminda ku e ta notifik’é riba e punto ya menshoná di manera, Hues Komisario pone un fecha e siman aki pa atendé e petishon di Jamaloodin.

Den e karta lo hasi menshon ku Jamaloodin lo no tei personalmente, pero lo por tend’é di un otro forma.

Bron: Extra