WILLEMSTAD.- Empresario i filántropo Gregory Elias ayera durante interogashon dor di un komishon di interogashon di Parlamento ulandes a desmentí kategorikamente ku e tin un relashon di trabou ku e kompania di Panama Mossack Fonseca.
E kompania a yuda kliente próspero pa kita nan sèn for di wowo di fisko. Segun Elias ta “kompletamente inkorekto” ku e ta traha huntu ku e kompania di Panama. Tambe Elias a splika ku ta hopi di lamentá ku nòmber di su persona i su kompania United Trust ta ser menshoná den konekshon ku Mossack Fonseca.
Parlamento ulandes algun dia pasá a kuminsá un lucha pisá kontra evashon di impuesto na Ulanda. Esaki ta basá riba Panama Papers. Nòmber di kompania di Elias ta keda menshoná 312 bia den e Papers. Segun Elias”‘no mas ku tres” di su klientenan tabata den kontakto ku Mossack Fonseca. Pero nunka el a traha ku e kompania.
Elias ayera a keda interogá den kuadro di un investigashon intensivo di Parlamento ulandes tokante evashon di impuesto na Ulanda. Parlamento ulandes ta usa e sistema di “Interogashon Parlamentario’ pa interogá diferente testigunan. Testigunan ta obligá di bin Parlamento kaminda bou di huramentashon nan tin ku kontestá preguntanan di Parlamentarionan ku ta sinta den e komishon.
Segun Elias semper e ta traha den kuadronan di lei di Kòrsou. Su trabou ta entre otro pa duna klientenan konseho fiskal. El a enfatisá ku nunka el a kibra lei.
Bron: Extra