WILLEMSTAD,- ‘Awor e partidonan a kuminsá bai un tiki mas den kontenido; entre otro tokante repartishon di karteranan. Mi ta kere ta bon pa duna partidonan e chèns pa hasie’le.’

Asina David Dick, miembro di tim di negoshashon di partido PAR a splika ayera despues ku reunion entre partidonan MAN, PAR, PNP i Pueblo Soberano. Timnan di negoshadó lo kontinuá ku reunion awe mainta. ‘Mi no ke spekulá tokante e resultado di e reunion tokante repartishon di karetera. Mi ke duna e proseso un tiki mas tempu. Nos tur a mira kuantu tempu e diskushon di 12, 13 òf 14 asiento a dura. (Ku tabata e diskushon pa amplia e akuerdo di partidonan di MAN, PAR, PNP i PS ku partidonan Un Kòrsou Hustu i Movementu Progresivo, EXTRA). Si mi ta bai spekulá tokante repartishon, mi no ta yuda henter e proseso, p’esei mi ta preferá pa no duna komentario riba esaki.’

Segun Dick e reunion di ayera tabata e promé reunion di e partido ku ke forma e próksimo gobièrnu di Kòrsou, tokante kontenido. ‘Na mi opinion ta hopi kurú si awor mi ta bai den detaye. Mester duna partidonan tempu pa deliberá.’ Dick ta spera ku tur hende lo duna e partidonan e tempu ei. Prensa tambe. ‘Pasobra kada dia bo ta tende òf lesa algu den prensa tokante proseso di formashon.’

Dick ta splika ku den prensa el a tende ku PAR a pidi diferente karteranan, manera Ekonomia, Finansa i Hustisia. Dick: ‘Laga mi splika bon kla ku PAR no a pidi nada. Informador a bisa ku na su kalkulashon e ta sugirí ku PAR ta haña tres minister. Nos semper a papia tokante kontenido. Nos mester tin un gobièrnu balansá. PAR semper tabatin un partido di konsenso. Nos no ta eksigiendo nada.’

Bron: extra