WILLEMSTAD. – Mayornan no tin mester di apoderashon pa lanta plaka for di buki di banko di yunan menor di edat. Esaki ta loke ku Korte Sivil a dikta resientemente den un disputa ku a surgi, ora ku mayornan di kuater yu menor di edat a bai pa lanta plaka for di nan buki di spar i ku banko MCB a nenga di entregá e mayornan plaka i a manda e mayornan korte.
Mayornan di kuater yu menor di edat a entregá un petishon na korte, pa nan haña apoderashon pa lanta plaka for di buki di banko ku nan ta spar sèn pa nan yunan. Ta trata di e plan di spar di menornan di edat ku e banko tin.
Ta trata di un disputa ku a kuminsá for di fin di aña pasá, kaminda ku e mayornan a splika e hues ku a atendé e kaso hues mr. Van der Bunt ku nan no por spar masha dia mas riba e bukinan di banko di nan yunan, pa motibu ku e tata a pèrdè trabou.
Konsekuentemente e tata no tin entrada, ke men no por spar tampoko riba e bukinan di banko.
Pero esaki no tabata e problema, e problema a surgi ora ku asta e djòpnan ku e tata ta haña di mètslá, tambe no tabata drenta mas i nan tin mester di plaka pa sigui ku nan bida, esta kumpra kuminda pa e famia, paga gastunan mensual pa e kas por sigui drai.
Esaki a pone ku e mayornan a bai banko pa lanta plaka for di e bukinan di banko di e yunan pa nan por kubri e gastunan di luna.
MCB a nenga di lanta e plaka pa nan i a bisa e mayornan ku si nan ke, nan bai korte.
Esaki ta loke ku e mayornan a hasi tambe i e kaso a keda tratá.
Hues den su veredikto a mustra riba vários artíkulo di lei ku ta konserní e kódigo sivil i ku finalmente e konklushon ta ku mayornan no tin mester di apoderashon pa lanta plaka for di buki di banko di nan yunan menor di edat.
Esaki a pone ku e hues a nulofiká e petishon di e mayornan, pero nulofikando e petishon, ta habri kaminda pa e mayornan bai banko i lanta e plaka for di riba buki di banko di nan yunan, sin banko por oponé kontra di esaki.
Bron: Extra