WILLEMSTAD.– Awe mainta Gregory Elias mester presentá su mes dilanti un komishon Parlamentario di interogashon di Parlamento ulandes. Esaki tin di aber ku un investigashon intensivo di Parlamento ulandes tokante evashon di impuesto na Ulanda.

Pa promé biaha den hopi tempu Parlamento ulandes ta usa e sistema di ‘Interogashon Parlamentario’ ku ta nèt algu bou di ‘Enkuesta Parlamentario’. Ta papia di un medio investigativo masha pisá ku Parlamento por apliká. Testigunan ta obligá di bin Parlamento kaminda bou di huramentashon nan tin ku kontesta preguntanan di Parlamentarionan ku ta sinta den e komishon speshal ku ta bai instituí. E investigashon aki ta bin riba insistensia di PvDA i GroenLinks di oposishon. Parlamentarionan dje dos frakshonnan aki a mobilisá pa saka tur loke ta posibel na informashon basá riba Panama Papers.

Parlamento ulandes a kuminsá un lucha pisá kontra evashon di impuesto na Ulanda. Ku esaki nan tin hopi interes pa kompanianan di apartado postal.

Ta intenshon pa skucha representantenan di kantornan di trust i kompanianan di apartado postal i ekspertonan ku ta traha konstrukshonnan kompliká ku ta fasilitá evashon di impuesto ku siudadanonan riku ta usa pa saka nan plaka fo’i Ulanda i paga ménos impuesto posibel.

Gregory Elias komo doño di United Trust lo ta un di e testigunan. United Trust tin ofisinanan na Kòrsou i Amsterdam.

Bron: Extra