WILLEMSTAD. – Servisio Meteorológiko ta informá ku mester tene prekoushon pa laman brutu. Den e kuadro aki nos ta papia di kódigo hel.
Bientu ta supla for di direkshon generalmente ost i moderá te basta fuerte; 4 te 5 (20 te 39 km/ora, 11 te 21 nudo). Prinsipalmente den dia, de bes en kuando fuerte te posiblemente duru den ráfaga; forsa 6 te 7 (40 te 61 km/ora, 22 te 33 nudo).
Situashon general: Diferensia di preshon den área di Karibe ta birando gradualmente mas grandi, p’esei un régimen di bientu basta fuerte lo bai dominá nos tempu den e próksimo 24 ora i un kódigo hel a wòrdu emití debí na e situashon aki.
Ademas mayoria nubia den nos region lo ta fini i solamente na algun kaminda aislá awa por kai un ratu kòrtiku durante di mayan mardugá òf mainta tempran.
Meteo ta sigui bisa ku por lo general wer seku lo sigui prevalesé te por lo ménos djasabra.
Kondishon di laman por lo general lo ta moderá ku altura di olanan entre di 1 i 2 meter (3 te 7 pia). Mas lat ayera nochi i djasabra laman lo ta moderá te basta brutu ku altura di ola entre di 1.5 pa 2.5 meter ( 5 pa 8 pia) p’esei un kódigo hel a wòrdu emití.
Bron: Extra