WILLEMSTAD.- Den un ambiente ameno i yen di antisipashon, patio di Academy Hotel Curaçao (AHC) tabata esenario pa selebrashon i entrega di sertifikado na e “Studiante, Supervisor i Rising Star di luna” di mart 2017.
Mènedjer di kada departamento di e hotèl a presentá su propio nominado ku ta den kontienda pa e premio máksimo komo studiante òf supervisor di luna.
E nominadonan ta Justin Ruiter di ICUC pa ‘Kushina’, Betsy Duarte di ICUC pa ‘Restaurant’, Emerald Daniel di Nilda Pinto SBO pa ‘Housekeeping’, Frejeany Daal di ICUC pa ‘Front Office’,
Ganadó apsoluto komo Studiante di Luna a resultá Justin Ruiter i komo Supervisor di Luna, Emerald Daniel. Ku e elogio akí, e tim di Academy Hotel Curaçao ta duna realse na e trabou di e hóbennan ku ta yuda nan departamento destaká.
Asina ta stimulá i motivá e stazjèrnan di tur departamento pa duna mas tantu posibel di nan parti, traha riba nan desaroyo personal komo profeshonal den proseso di praktiká i sigui resaltá ku bon trabou i aktitut.
For di awor tur hende ta ansioso pa destaká i keda nominá pa luna di aprel.
Rising Stars
Banda di premia un studiante i un supervisor ku ta resaltá i ku ta demostrá ku nan ta ehemplar durante henter e luna konserní, e tim di maneho di AHC tin adishonal e aña akí e nominashon ‘Rising Star’.
Ku e nominashon akí, e tim ke para ketu na e talentonan ku ta demostrá hopi potensial den e área kaminda nan a profilá e luna ei. E dos stazjèrnan ku a risibí e rekonosementu spesial komo Rising Star pa mart 2017 ta Jurnick Merced di ICUC pa ´Restaurant´, Farion Pantphlet di Regina Pacis pa `Kushina´ i Raygione Mercera di AGO St. Paulus pa ‘Kushina’.
For di 2007 Academy Hotel Curaçao ta dunando studiantenan lokal di tur nivel di enseñansa oportunidat pa kore stazje den hospitalidat. Impaktante di e hotèl aki ta ku e studiante ku ta kore stazje realmente ta haña espasio pa ta parti esensial di henter e trayekto operashonal di e hotèl i por asta fungi na nivel di supervisor.
E studiantenan ta responsabel pa dirigí i manehá e 40 kambernan di e hotèl ta funshonal i pa organisá i koordiná evento, reunion òf kualke otro aktividat tantu pa turista internashonal komo lokal, bou di guia di e staf profeshonal. E tim kompleto di AHC gustosamente ta para kla pa sirbi huéspetnan internashonal i lokal i ta rekordá komunidat di Kòrsou ku danki na reservashon nan pa estadia den hotèl i uso di e restorant dinámiko ku e luna aki a sa di destaká, studiantenan lokal ta prepará intensivamente riba e karera ku nan a skohe i nos tur ku kontribuí na e inisiativa aki ta aportá na presente i futuro di nos pais.
Bron: Extra