WILLEMSTAD.- Reunion di Parlamento ku 11 parlamentario, ku a tuma lugá ayera anochi, segun lider di MFK Gerrit Schotte tabata un “dia históriko”. Schotte a bisa ayera: “Nos tin mayoria, nos tin 11.
Ta bon pa nos konstatá ku nos tin un mayoria. Tin un lista di presensia, i no tin 4 òf 5 hende sintá den sala di parlamento, papiando i pretendiendo di tuma desishon.
Awe den sala di Parlamento tin 11 parlamentario, esaki ta un mayoria. Reunion públiko a kuminsá ku quorum manera ta stipulá.”
Schotte: “Nos a yama reunion públiko mirando ku presidente di parlamento Giselle Mc William, ku no ta presente awe, ku supuestamente mester traha pa su sèn durante siman di reunion, a kanselá tur reunion pa henter e siman.
Reunion di komishon fiho, komishon sentral, reunion públiko. Tur a wòrdu anulá.” Schotte a menshoná ku Koeiman a tuma desishon pa saka ministernan Cordoba i Larmonie-Cecilia for di Konseho di Minister. “Koeiman, sintá den Fòrti ku no tin sosten di mayoria den Parlamento, a mèldu únikamente e dos personanan ku te ainda ta gosa konfiansa di mayoria parti di parlamento pa nan bandoná sala di Konseho di Minister. Esaki no por.”
Schotte: “Lider di partido MAN, Hensley Koeiman, ku simplemente pa falta di kapasidat i falta di liderazgo for di dia 1 a krea un bochincha den e pais aki formando un gobièrnu.” Reunion di ayera tabata yamá pa drecha situashon ku a keda kreá dor di Koeiman. Schotte a splika.
Bron: Extra
Reunion di parlamento di ayera no tin base legal
WILLEMSTAD. – Den su kontesta na prensa ayera Minister Suzanne Camelia-Römer a duna di konosé ku 11 hende no por drenta un sala anto bisa awor ta nan ta parlamento pa motibu ku nan ta mayoria.
Camelia-Römer a splika ku tin regla pa e mayoria ei tambe i tin regla kon ta atendé ku moshon di deskonfiansa. Si e grupo aki aktua fuera di lei, nan ta ilegal.
Mañan Gobernador no por bai mete den un reunion ilegal. E no por hasié, Camelia-Römer a bisa. Gobernador mester ta hopi konsiente di esaki.
Gobernador a haña un dekreto gubernamental i el a firma esaki, manera su deber ta, esta di firma pa motibu ku e dekreto ta konforme lei.
Awor un grupo di hende ta yama un reunion ilegal, e gobernador no por mete den un reunion ilegal.
E kos ta simpel segun Camelia-Römer, No ta tur ora tur hende mester ta di akuerdo ku otro, esei por, pero tin un demokrasia i un estado di derecho segun regla i lei pa atendé e asuntu aki.
Reglamento di órden ta splika bon kla kon ta yama un reunion.
Djabièrnè awor tin un reunion yamá den un forma legal.
E loke ku a pasa na aña 2012 ta un situashon otro ku e situashon aktual di 2017.
Camelia-Römer a splika ku e sa ku gobernador no por bisa nada otro ku e desishon tumá ayera di parti e grupo di 11 ta ilegal.
Esaki ta un reunion bruá ku a tuma lugá den parlamento kaminda ku nan a hunga presidente i griffier i esaki no ta legal.
Bron: Extra
Yep, een historische porkería!
Illegale vergadering