WILLEMSTAD.- Un avion di KLM ku tabata bayendo Ulanda ayera, mester a regresá Kòrsou, debí ku un para bastante grandi a dal den e motor. Dor di esaki e kapitan a optá pa regresá Kòrsou.

Mesora huma pretu tabata sali for di e motor. Durante di su regreso, e avion a kumpli ku proseduranan di tira fuel afó, pa e ta lihero pa por baha na aeropuerto. Esei a sosodé tambe. E avion a baha sin ningun difikultat na aeropuerto Hato. Tabatin mas di 400 pasahero abordo, e avion tabata yen yen.

For di bosero di KLM, EXTRA a komprondé ku ta trata di un para grandi ku a dal den e motor. Dor di esei e motor a haña un daño grandi. E pasaheronan ku no tin famia na Kòrsou a keda aloká den hotèl. Esnan di Kòrsou por a bai nan kas, sperando riba yamada di KLM pa indiká ki dia avion lo lanta atrobe.

E bosero a bisa EXTRA ku lo dura sigur 24 ora pa e pasaheronan por regresá Ulanda. Mañan tin buelo, pero esaki ta yen kaba, i lo mester saka otro avion for di Ulanda, i si tin tambe, pa bin Kòrsou pe bai ku e pasaheronan aki.

Bron: Extra