WILLEMSTAD – Gerrit Schotte a dirigí un karta na Promé Minister Daniel Hodge relashoná ku e parke di generatornan Aggreko ku tin riba terenonan di Aqualectra. Den su karta sr. Schotte ta bisa ku, el a tuma nota di presensia bek di generator nan di hür for di e kompania Aggreko.
Pa e motibu aki frakshon di MFK por medio di su persona kier hasi señor Minister e siguiente preguntanan, hasiendo uso di artíkulo 96 di Reglamento di Órden di Parlamento: Kiko a pasa ku e plan di optimalisashon di operashon i tambe di mantenementu di produkshon di koriente di plantanan eksistente di Aqualectra?
Semper gerensia di Aqualectra a skonde retraso di mantenshon pa Akshonista i a ninga ku esaki ta eksistí p’esei e siguiente pregunta; Tin “backlog” di mantenementu atrobe den operashon di produkshon di koriente i awa di Aqualectra? Si e kontesta ta si?
Kiko e motibu ta ku atrobe Aqualectra tin retraso den mantenshon di su plantanan?
No ta kumpliendo ku oranan di mantenshon stipulá pa kada planta?
Tin debe atrobe na esnan ku ta bende Aqualectra piesanan pa su plantanan?
Ta bezig ta drei plantanan sin para nan pa nan mantenshon despues di oranan di produkshon stipulá?
Na Desèmber 2011 a presentá un “Maintenance Document 2012” no a kumpli ku esaki atrobe ?
Kuantu Aggreko a wòrdu di hür atrobe dor di Aqualectra?
Pa kuantu tempu esakinan a bin den liña di produkshon di koriente di Aqualectra?
E kontrakt firma ku Aggreko (na kuminsamentu di 2013) su durashon ta di kuantu tempu?
Kiko e total di Aggrekonan na Megawat ta?
Kuantu Aqualectra tin ku paga na Hür pa kada kònteiner di Aggreko?
Kua lo ta e rekargo na pueblo den preis di koriente i awa pa motibu di hürmentu i produkshon di koriente i awa atraves di Aggrekonan? Kua tipo di fuel, Aggrekonan di hür dor di Aqualectra lo bai usa?
Tin mehoramentu di e tereno tumando lugá na e momentunan aki na e sitio kaminda a pone e Aggrekonan esta na Mundu Nobo i kuantu e gastunan envolví ku esaki ta?
A anunsiá desmantelashon di plantanan na Mundu Nobo den pasado dor di Gerensia di Aqualectra esaki a para?
Kuantu sèn tin envolví ku hürmentu di Festival Center pa parker kònteinernan di Aggreko temporalmente, promé ku hinka nan den produkshon?
For di ki dia a kuminsá hür e Aggrekonan konforme kontrakt firma anto ki dia a kuminsá usa nan realmente?
Aggreko ta paga komishon pa e kontrakt firma ku Aqualectra “Closing Fees” òf algu similar? Tabata tin intermediario entre Aqualectra i Aggreko den e kontrakt resientemente firma ku Aggreko? Si ta si, ta kua kompania a aktua komo intermediario?
Tur lokual ta sosodiendo rondó di kontrakt firma ku e kompania Aggreko, hürmentu di Festival Center, invershon pa drecha e tereno na Mundu Nobo, hür di Aggrekonan ta presupuestá den presupuesto di Aqualectra?
Of esakinan ta gastunan adishonal ku Aqualectra tin ku buska kon ta bai dek nan ainda? Dikon Aqualectra no a kuminsá traha su plantanan propio ainda?
I a bolbe bai hür planta di Aggreko?
Konta ku finansiamentu di e proyekto di su propio plantanan?
Ta bèrdat ku mayoria kompania/fábrika di plantanan tambe ta ofresé finansiamentu?
Ta drechando e tereno di Aqualectra na Dokweg kiko ta hasiendo ku e lodo i tera ku a saka for di einan?
Ta konsiente ku e lodo i tera aki ta kontaminá?
Tur lokual ta sosodiendo na e momentonan aki ta e maneho nobo ku Sr. Daniel Hodge komo kabes di Gobièrnu a introdusí den Aqualectra komo akshonista?