TIN HOPI konfushon entorno artíkulo 53 di nos Areglo di Estado. Kon ta bai bringa, segun mi, un entrepretashon abusivo di lei di nos dushi nashon/ estado ku yama Kòrsou. No interpreta mi malu, ami a bringa durisimo pa: 1. a purba manda e parlamentu i gobièrnu, ku nan a pone, kas; 2. i pone elekshon adelanta mas pronto posibel, pero ku un ‘care taker governement’ di 3 luna, ku tin sosten di ámbos lado di banki den parlamento.
Pakiko: Kada parlamentario ta hura a ‘titre Personal’. Lei no konose partido polítiko. Kon un gobièrnu ku no tin mayoria mas den parlamento por manda parlamento kas? Pa ami ku no ta hurista, pero ku un sierto di dosís di ‘common sense’ e ta zona kompletamente ilógiko loke e gobièrnu Schotte a hasi. Si, mi por imaginá’mi un gobièrnu ku tin mayoria den parlamento, pa motibu stratégiko, ta hasi algu asina, pero no un gobièrnu ku na sierto momento ta pèrdè mayoria, i sin sondia posibilidat di un koalishon alternativa ta keda aktua manera ta e tin mandato di parlamento. Segun mi un gobièrnu ku pèrdè mayoria, solamente por ofresé su retiro i responsabilisá su mes ante e parlamento ku a dun’e e mandato pa gobernó, nada mas. Nos gobernador a pega soño atrobe, of semper ela keda na soño? Kua hurista ku outiridat manera por ehèmpel sr. Carolus of sr. Lichtveld òf otronan por duna e pueblo aki un intrpretashon kla i raspa? Pueblo ta pidi un klaridat, komo un país yen di speransa pa hasi su kosnan mas korekto ku pasado. RUBEN SURIEL Curaçao