‘Minister no por duna niun instrukshon den kaso-Wiels’

WILLEMSTAD,- Minister di Hustisia Ornelio ‘Kid’ Martina ayera a splika ku tratamentu di kaso di asesinato di parlamentario Helmin Wiels ta kompletamente den man di Ministerio Públiko.

Martina ayera durante reunion públiko di Parlamento di Kòrsou a reakshoná riba pregunta di parlamentario Humphrey Davelaar.

‘Sr. Davelaar ta puntra kiko gobièrnu ta pensa riba instrukshon ku por duna pa aselerá tratamentu di kaso-Wiels’, Martina a splika. El a kontesta: ‘No tin duda ku e kaso aki tin atenshon di Ministerio Públiko. Gobièrnu, lesa minister di Hustisia, no por duna niun instrukshon pa un kaso individual pa grandi òf chikitu ku e kaso ta.

E minister di Hustisia no tin, ni no mag di hasi esaki, konforme posibilidatnan ku lei ta dune’le. Lokual si e por i mag hasi ta duna asina yama ‘algemene richtlijnen’. Por ehèmpel e minister por instruí Ministerio Públiko pa pone aksènt riba persiguishon i hiba korte tur hende ku a mata òf laga mata un otro ser humano di nos dushi isla Kòrsou. Ken ku e ta, kon ku e yama òf kua funshon e ta okupá.’

Martina a sigui: ‘E minister nobo aki lo no duna fecha pa niun kaso, esun di Wiels tampoko. Esei ta trabou di Ministerio Públiko. No di minister di Hustisia.’

A mata parlamentario Helmin Wiels dia 5 di mei 2013. Eks-minister di Hustisia Nelson Navarro pa diferente aña a splika ku ta su deseo pa Ministerio Públiko hiba e hendenan korte ku a duna órden pa mata Wiels, promé ku el a baha komo minister.

Bron: Extra