“Nos ta entrega lista di kandidato, na otro banda nos ke para elekshon” | Extra

WILLEMSTAD.- Segun Meindert “Menki” Rojer, number 2 riba lista di partido Kòrsou di Nos Tur desishon pa bai elekshon no ta bai segun regla.

Frakshon di Kòrsou di Nos Tur, huntu ku frakshon di MFK, Pueblo Soberano, Movementu Progresivo i parlamentarionan independiente Eduard Braam i Gassan Dannawi ta kontra desishon di gabinete-Koeiman pa disolvé Parlamento i bin ku elekshon dia 28 di aprel 2017. “Nos ta tumando diferente paso kontra e desishon, pero nos no por kore riesgo pa no inskribí den elekshon.” Rojer ta sigui: “Nos ta mira bon bon ku e prosedura no a bai segun regla. Pero nos tin un ‘tweesporenbeleid’. Na un banda nos ta entregá lista di kandidato pa Kòrsou di Nos Tur. Na otro banda nos ta hiba proseso pa para elekshon.”

Segun Rojer kampaña di Kòrsou di Nos Tur no a para nunka. “E siman despues di klousura di elekshon, mesora nos a sigui bai bario, tene kontakto ku nos hendenan i yuda nan ku e kosnan ku nos por yuda nan. Elekshon no ta un sorpresa pa nos. Pero e manera ku a wòrdu hasí pa yega na elekshon, nos ta kompletu kontra di dje.”

Kòrsou di Nos Tur no a bin ku hopi kambio riba lista di kandidato. Rojer ta splika ku Eduard Braam a bin komo number 3 riba lista. Norberto Ribeiro a bai bou di lista for di number 3, dor ku e ta bai okupá puesto ministerial, Rojer ta splika. Rojer a bai number 2, Carlos Monk a keda riba number 4 di e lista.

Rojer: “E lista ku nos a bai elekshon aña pasá, nos a gana kuné. Nunka bo mester kambia un tim ganadó.”

Bron: Extra