Hustu: Poder no ta di polítikonan, polítikonan ta sirbidó | Extra

WILLEMSTAD.- Omayra Leeflang, komo lider di Un Kòrsou Hustu, ta splika ku polítikonan a haña voto di pueblo aña pasá. “I nos no a logra e lokual ku nos a ker a hasi. No ta importá ta ken su falta. Punto ta ku nos no a logra hasié.”

Leeflang ta splika ku e poder semper ta di pueblo. “Mi ta na opinion ku mester duna poder bèk na pueblo. Pasobra ta di pueblo e ta. I laga pueblo atrobe determiná: ken, kua i kuantu.” Segun Leeflang nunka esaki lo por ta un kos ku bo mester tin duele, “pasobra poder ta di pueblo”. “Por ta esaki ta e lès ku nos por siña for di e turbulensia ku a tuma lugá den Parlamento resientemente. Poder no ta di polítikonan. Polítikonan ta sirbidó. Nos tin ku sirbi e pueblo.” Segun Leeflang awor ta tempu pa pueblo skohe un bia mas. Den e kuadro aki Un Kòrsou Hustu ayera a entregá su lista di kandidato. “Na promé lugá e lista ta un tiki mas largu”, Leeflang ta splika ku un sonrisa riba su kara: “Nos tin 22 hende riba lista. Esei ta nifiká ku nos por yena tur 21 asiento den Parlamento, plùs pone minister-presidente.” Despues el a sigui mas serio: “Nos tin hende nobo. Esei tambe ta un kos bon.” Segun Leeflang un organisashon mester por ahustá su mes na sierto desaroyo nobo. “Nos tin por ehèmpel Reinier Lijfrock, komo number 9 riba lista. Pa mi esaki ta un promesa ku nos mester tin un skol di Arte.”

Tambe Leeflang a bin ku un punto nobo: Asuntu di awa i koriente. “Di tantu hende awa ta keda kòrtá. Nos ta bin ku un plan, no un promesa tirá, pero un plan kon pa solushoná e debe di e hendenan ei. Duna nan awa bèk i alabes guia nan pa nan no kai bèk den mesun problema. Anto esaki ta un plan serio pa ku e dianan ku ta bini nos lo desaroyá i duna prensa”, Leeflang a bisa.

Bron: Extra