Dr. Eduard Braam #3 riba “Kòrsou di Nos Tur” | Extra

WILLEMSTAD.- Dr. Eduard Braam ta forma parti di Lista di “Kòrsou di Nos Tur” komo number 3. Esaki EXTRA por a komprondé for di un kombersashon sostené ku dòkter Braam ayera.

El a splika EXTRA ku e tabatin diferente opshon entre otro pa forma ku Movementu Futuro Kòrsou tambe. Pero el a skohe pa e partido di Amparo Dos Santos esta Kòrsou di Nos Tur pasobra e ta sinti tòg ku einan e por tin un funshon di un “brugebouwer”.

Manera ta ampliamente konosí, dòkter Braam a forma parti di partido PAR pa hopi tempu pero elekshon último, pa un desakuerdo el a bira independiente den parlamento di Kòrsou. Esaki el a hasi ku hopi honor i nunka a bin dilanti komo un persona ku ta buska diskushon pero mas bien buska solushon pa problemanan.

Dòkter Braam a bisa EXTRA ku e ta sintié kómodo den partido Kòrsou di Nos Tur. E ta sinti ku e por tin e funshon di konstruí puentenan riba diferente tereno.

Kòrsou di nos tur ta un partido hóben i pa dòkter Braam lo ta un reto pe entre otro pa e por funshoná komo un eksponente polítiko ku por organisá seminarionan pa traha riba profeshonalismo di esnan hóben den e mundu polítiko.

Dòkter Braam ta kere den kooperá ku esun sosial i esun sosial demókrata. E  tin un karakter sosial i kapital hustu. E ta kere den empoderá esun ku sèn pa asina e por traha mas sèn pa yuda otro ku mester. Sin sèn no por hasi nada, ta e opinion di dòkter Braam.

I p’esei mes e ta sintié konfortabel den Partido Kòrsou di Nos Tur.

Bron: Extra