Awor ta bai interogá Gerrit Schotte den kaso “Wilhemina | Extra

WILLEMSTAD.- Lo mi no deskansá te ora laga Yael Plet i su partido ku a sostené paga pa loke nan a hasi ku mi i mi famia, esaki ta deklarashon di parlamentario i lider di MFK Gerrit Schotte na EXTRA.

El a konfirmá pa EXTRA ku mayan e lo keda interogá pa promé biaha den e kaso Wilhelmina. Ta trata di e kaso kaminda e ta sospechoso di soborno. Ta trata aki di un denunsia ku e aktual parlamentario pa Man Yael Plet a hasi dia 18 di febrüari di e aña aki.

E ta akusá Schotte, Charles Cooper i Gilbert Ricardo di kier a pag’é pa e bandoná su partido i laga gobièrnu kai.

Dia 5 di aprel e aña aki, den oranan tempran di mainta outoridatnan a tene entradanan hudisial na kas di Gerrit Schotte, tambe na kas di Charles Cooper i e empresario Gilbert Ricardo.

Den kas di Charles Cooper a haña suma grandi di plaka kèsh, pero remarkabel ta ku despues di algun luna a entregá tur e sèn bèk na sr Cooper i su kasa ku ta dòkter.

Pa loke ta Gilbert Ricardo, despues di e entrada hudisial na su kas, Yael Plet lo a dun’é un karta firmá ku e no ta den nada.

Konsekuentemente a keda Gerrit Schotte.

Sr. Schotte a konfirmá pa EXTRA ku awe ta bai interog’é, despues di 5 luna ku ta drenta su kas, kousa konsternashon den su famia i purba daña su nòmber djis den porta di elekshon.

E lider polítiko a bisa EXTRA ku e lo no deskansá te ora e laga Yael Plet i su partido paga pa e mentira ku a keda lantá kontra di dje.

E ke sa i e ta spera ku awe lo por presentá ku pruebanan ki dia, i na unda e por a ofresé sèn na e hóben parlamentario.

Loke si ta un echo ta e daño ku a kousa riba famia Schotte, asina e lider polítiko a terminá bisando.

Bron: Extra