Opinie Kòrsou Fuerte i Outónomo

WILLEMSTAD.- Kualke koalishon nobo tambe lo sinti e preshon di e divishon ku e leinan di konsenso a trese. Un referèndem ta e úniko vèntil ku por atendé i solushoná e divishon aki.

Lo ta tarea di e koalishon nobo pa no laga e kandela aki sigui i lanta mas haltu. Kòrsou Fuerte i Outónomo ta bisa ku no tin ningun hustifikashon pa e leinan a-demokrátiko aki. Bloke NO ta konta ku MAN lo guia e proseso pa haña nos podernan estatal bèk den nos man.

Hopi ta konsiderá nan voto pa MAN un voto pa mas libertat i un protesta kontra e leinan di konsenso. Pasobra ta loke MAN semper a propagá i hasta firma pe nèt promé ku lastu elekshon. MAN a komprometé di ta para pa un referèndem nobo i limpi. Amor pa Kòrsou ta eksigí normanan elevá pa mantené e oposishon kontra e leinan aki ku a mina poder di nos pueblo. Derechi di outodeterminashon ta un derechi natural. E leinan aki, na kua nos ta mará aworakí, ta un abusu kontra demokrasia. Mester konfia ku MAN ku ta forma parti di e frente kontra e leinan aki lo no laga Kòrsou supordiná na nan. KFO ta eksigí e derechi pa evaluá i disidí riba e leinan aki.

Ta tempu pa promové koperashon entre e dos gruponan pa realisá un referèndem. Tur yu di Kòrsou mester uni pa eksigí un status ku ta digno pa nos, ku nos mes Prokuradó General, nos mes ekonomia i finansa bèk den nos man, ku nos propio banko sentral. Tin ku haña e podernan aki bèk i nos mester ta responsabel. Ta tempu pa konsenso entre nos ku nos. Mester buska e konsenso den parlamento pa uni forsa.

P’esei mester di koperashon di hòmber i muhé sinsero ku ta tuma responsabilidat pa loke nan a para i hasta firma pe. Unidat pa por rekonstruí nos patria. Un akuerdo patriótiko di buena fe. No tin motibu pa orguyo despues ku 10.10.10 a redusí nos den un karikatura demokrátiko den mundu di pueblo i nashonnan liber i sigur kompará ku Ulanda i Aruba.

KFO ta spera ku MAN lo hasi su esfuerso pa nos por rekobrá fe atrobe den nos propio grandesa. E viktoria di yu di Kòrsou riba yu di Kòrsou den un referèndem basá riba un kampaña di mentira i finansiá ku sèn hòrtá, tabata un derota pa Kòrsou i tur su yunan i un triunfo hábil pa polítika imperialista ulandes.

Un referèndem nobo por laga nase atrobe den nos e konsenshi di un hende liber pa ken dignidat no tin preis. No ta pòrnada nos a pasa den e kambio doloroso di katibu pa hende liber.

“Nos ta kargadó di un historia kruel di lucha pa libertat”, segun KFO. MAN tin di demostrá ku e no ta aktua pa propio interes i ku e ta un partido di hende noble, sabio i ku kurashi. Den un palabra, ku MAN tin patriotanan digno di representá tur esnan ku ken, pa dies aña largu, a kana brasa brasa den e lucha sagrado aki. MAN no por traishoná su mes mishon. Miéntras tantu e resistensia organisá mester sigui.

Bin firma pa referèndem nobo i limpi, djasabra awor, 5 DI NOVEMBER, na tereno di deporte Marie Pampoen (vèlt di Ain), kantu di awa, FOR DI 11’ OR DI MAINTA TE 3 ‘OR DI ATARDI, i probechá dal bo kari kari di tribon, bo salada di tribon òf bo kabritu stoba, huntu ku bo sòpi piská òf sòpi yuana. NO mester di bo awor mas ku nunka.

Kòrsou Fuerte i Outónomo