Ministerio Públiko studiando si Peppie Sulvaran a hasi su mes kastigabel

[audio mp3="http://knipselkrant-curacao.com//wp-content/uploads/2016/12/2016-12-16-Peppie-Sulvaran-op-Radio-Mas-over-Koeiman-regeerakkoord-consensusrijkswetten-opstand-en-brand.mp3"][/audio]

WILLEMSTAD. – Ministerio Públiko ta studiando ekspreshonnan resien hasí di Eldon “Peppie” Sulvaran, den kuadro di echo kastigabel, segun hurisprudensianan.

Resientemente Sulavaran ku den bida diario su profeshon ta abogado, a duna un entrevista siman pasá na un radio emisora, kaminda ku hopi hende por interpretá e loke ku Sulvaran a trese dilanti komo un yamada pa ban kima Kòrsou i si morto tin di kai, laga morto kai.

Ministerio Públiko ta investigando e posibilidat riba un persiguishon penal, konsiderando e loke ku Sulvaran a trese dilanti den e entrevista ku ta instigashon den e sentido kastigabel.

Sulvaran su ekspreshon ta relashoná ku formashon di e gobièrnu aktual, kaminda ku e ta di opinion ku e partido MAN a bira lomba pa e ideologianan i prinsipionan ku e movementu NO tabata propagá.

Segun Sulvaran hopi hende a vota MAN keriendo ku nan prinsipio ta NO.

Formando gobièrnu ku partido PAR i Nashonal, segun Sulvaran, ta un bòftá den kara di e votadó di MAN i ku di e forma aki, a entregá Kòrsou den man di ulandesnan.

Pueblo di Kòrsou mester haña su pais bèk den su man i si ta na vlam Kòrsou tin di bai pa haña e pais aki bèk den man, anto e mester bai na vlam. Si ta morto tin di kai, anto morto lo mester kai. Finalmente e ta bisa ku ta su opinion.

Esaki ta ekspreshonnan ku Ministerio Públiko ta studiando, pa wak kon leu tin echonan kastigabel ku a tuma lugá.

Bron: Extra