...Relashoná ku kaso Bandera Grill...

WILLEMSTAD.- E kaso ku a kuminsá ku denunsia di supuesto sekuestro ku e propietario di Bandera Grill a denunsia públikamente, tin un rabu basta largu paso djabièrnè a detené dos agente polisial maskulino di respektivamente famnan W. i P.

Kuerpo Polisial a duna di konosí ku e agentenan polisial menshoná anteriormente a hasi nan mes kulpabel na perhurio i falsifikashon di dokumento.

Detenshon di e dos polisnan aki ta en konekshon ku e kaso den kua un dama Venezolano a duna keho tokante di trafikashon di hende i den kua anteriormente (4 di novèmber último) a detené e doño di Bandera Grill W.B.L.R. di 53 aña di edat i su pareha A.A.S. di 44 aña di edat, ámbos nasé na Kòrsou i un agente polisial R.J.L.R. nasé na Kòrsou di 54 aña di edat.

E kaso aki a sali den publisidat despues ku e doño di Bandera Grill, Willem La Reine a bisa “dos polis a drenta den mi negoshi algun siman pasá, presis 10 minüt promé ku 12 ‘or di anochi i nan a bai ku un mucha muhé ku tabatin presente. Anto te ainda mi no a tende nada mas di dje.’

Segun La Reine ta trata di e dama Benfilmar Camacho, nase 23 di Mei 1996 na Punto Fiho, Venezuela.

Sorprendentemente djis algun dia despues representante di un organisashon ku ta sali pa derecho di latinonan a bai un emisora pa bisa ku Benfilmar Camacho no ta sekuestrá, pero mas bien skondí pa su propio protekshon.

Paso supuestamente a gañá Benfilmar Camacho ku e ta bin Kòrsou pa traha un trabou desente, sinembargo a resultá ku ta trabou di prostituta e tin ku hasi.

Aparentemente e deklarashonnan aki a keda añadí na e investigashon polisial ku tabata andando paso despues, manera a indiká anteriormente kaba, e doño Bandera Grill mes a keda detené komo sospechoso.

Awó ta resultá ku tin dos agente polisial mas envolví den e kaso aki, pues na e momento aki tin 2 agente polisial detené komo sospechoso, komo ku esun ku tabata detené anteriormente dia 4 di novèmber último a rekobrá su libertat.

Dia pa dia, segun ku e investigashon ta andando, e personanan ku ta envolví den e kaso aki ta oumentando, spesialmente e kantidat di agentenan polisial metí den e tráfiko humano.

Bron: extra