Churandy Martina ta orguyo di Kòrsou
Willemstad – Nos kampion. Esei ta nos Churandy Martina, ku awe a kore 200 meter na Weganan Olímpiko 2012 na London. Churandy no a logra bai ku medaya pero tòch a alsa nòmber di nos pais un biaha mas ku e resultado na di sinku lugá.
Tur kaminda pueblo di Kòrsou a para ketu un ratu pa apoyá Churandy ora e la kompetí pa e titulo máksimo di 200 meter den atletismo.
Djadumingu último tambe Kòrsou tabata pendiente pa Churandy su prestashon den e kareda di 100 meter. E la sali na di seis (6) lugá, pero a sa di resaltá.
Pa Gobièrnu i pueblo di Kòrsou Churandy ta nos kampion. E ta un ehèmpel pa nos hóbennan ku ta aspirá un karera den deporte. Danki pa bo aporte. Na nòmber di Pueblo di Kòrsou Gobièrnu ta felisitábo ku e prestashon grandi na London.
Minister-president demishonario Gerrit Schotte a felisitá Churandy personalmente na nòmber di Gobièrnu di Kòrsou via telefon despues di e final.