ALGUN GENERASHON atras, e kresementu tradishonal di nos populashon a keda interumpí pa un nivel di prokreashon mas abou. Ku otro palabra, nos no ta haña mes tantu yu ku ántes mas. E motibunan pa esaki no ta relevante aworaki. Loke si ta relevante ta e desbalanse ku esaki a krea. Un desbalanse ku nos por kompará ku un tsunami. E tsunami aki ta enbehesimentu di nos poblashon. Un tsunami ta karakterisá su mes pa un orígen silensioso, pero ku resultadonan devastador ora e olanan yega tera firme. Poko poko pero sigur nos ta sintiendo e olanan devastador di e enbehesimentu aki. E olanan di e tsunami aki, ta representá e kresementu kontinuo di gastunan di penshun i di kuido. For di den añanan 90 a kuminsa sinti e olanan aki. Tabata obvio ku mester a hasi algu pa mengua e efektonan di esaki. Hopi tabata e intentonan pa prinsipalmente atendé ku diferente otro faktor ku tabata hasi e problema aun mas pio. Al final, na e kousa básiko mes no por hasi nada. Pero awe despues di 2 dekada mester konstatá ku a hasi masha poko. Al kontrali, asta a tuma desishonnan ku a yuda empeorá e situashon. Ku konsekuensha ku e efektonan ta birando kada dia mas serio. Pa awe so kaba e défisit di e sektor públiko ta na alrededor di 400 mion (di kual mitar ta konsekuensha di e tsunami aki) i kresiendo. I komo si fuera e tsunami aki no ta basta problemátiko kaba, señalnan sismográfiko ta indiká ku tin un teremoto tambe na kaminda. Ta sigur ku esaki lo manifestá su mes na aña 2019, ku ta e aña den kua e kontrakt di Isla/areglo di offshore/areglo di pago di debe, lo vense. Esaki ta un teremoto, paso e efekto di algun di e susenonan aki lo ta kasi imediato. E dos katástrofe natural aki, a bin ta i lo sigi krea burakunan aun mas kuantioso den presupuesto di país. Dje kuantioso ei, ku no tin palabra pa deskribí esaki i su konsekuenshanan. Pa basta dia kaba mester a tuma e desishonnan (e tiponan ku ta kue e baka na su kachu, i no esnan di ménos resistensha) pa mengua e efektonan di e dos katástrofenan aki, ku kada dia mas ku pasa ta bira mas urgente. Nos ta na víspera di elekshon atrobe. I mester ta obvio ku kual sea ta e resultado, e problemanan aki no ta bai, i esnan ku ta aspirá di goberná, lo mester atendé ku nan. Mester ta obvio, ku goberná ku bienestar di futuro generashonan na pechu, ta enserá atendé ku muchu mas ku solamente e problema di prespuesto i e aanwijzing aktual. Un kos ta sigur, mas nos tarda den atendé ku e problemanan na un manera desisivo i struktural, mas devastador e desaroyonan aki lo ta pa e isla di Kòrsou. Devastador pa famianan, kompanianan, sektornan ekonómiko I sosial. Enfin, pa nos tur. MIKE WILLEM (Éks-minister/diputado i suidadano preokupá) Curaçao