Uw ingezonden brief in de Knipselkrant Curacao? Stuur uw brief voor 17:00 uur naar emailadres: INGEZONDEN. Wij publiceren uw brief zonder deze in te korten. De redactie van de Knipselkrant Curacao is niet verantwoordelijk voor de inhoud. Ingezonden stukken die beledigende of discriminerende taal bevatten worden door ons niet gepubliceerd.

Vandaag laten we Fundashon Kòrsou Fuerte I Outónomo (KFO) aan het woord

(Vorige week ingezonden, red) Awor ku tantu lider di partido MAN Hensley Koeiman komo informadó Kenneth Gijsbertha huntu ku miembronan di MAN, dia 14 di ougùstùs 2016 a firma serka grupo NO, ku nan ta para pa bin un referendum nobo i limpi, no por tin traishon. Nos ta konfia ku lo no mantené Kòrsou supordiná na lei di konsenso. MAN ku a propagá independensia den su programa, mester para tras di e idea ku desishon riba futuro di nos isla mester wòrdu tuma na Kòrsou, sin intervenshon kolonial. Mester uni pa eksigí un status nobo ku ta digno pa nos pueblo.

Nunka nos lo no meresé rèspèt di un pueblo liber manera esun Hulandes si nos laga nan keda disidí kiko tin di pasa ku nos bida. E leinan aki a produsí divishon peligroso i a afektá unidat di nos patria, kousando daño na nos relashon ku otro.Nan a lansa e yu di Kòrsou kontra e yu di Kòrsou. P’esei nos lo mantené firme nos oposishon i lo defendé ku tenasidat e derechi di pueblo pa e mes evaluá.Pa logra mester di koperashon di hòmber i muhé den un kousa ku ta inspirá responsabilidat pa loke nos ta para pe. Unidat ta nesesario pa rekonstruí nos patria. Unidat pa libertat, igualdat i fraternidat.Ku e leinan aki dirigiendo nos bida, ta probá kaba ku ta imposibel.

Ta tempu pa e nashonalismo ku MAN tambe a propagá, esta amor pa Kòrsou, konbertí su mes den un berdadero poder polítiko pa duna resistensia na opreshon i mentalidat kolonial.MAN ku su firma pa un referèndem limpi i nobo a mara su mes inkondishonalmente na e kousa. Referèndem ta e mekanismo di defensa polítiko i kultural i ta indispensabel pa bolbe habri komunikashon di buena fe entre nos.Nos pueblo mester kobra fe atrobe den su mes grandesa pa por rekobrá su podernan. Paso nos mester ta e úniko árbitro di nos destino i esun di nos yunan. Esnan ku a hòrta sèn di pueblo pa finansiá un kampaña ku meta pa desorientá e yu di Kòrsou ku manipulashon i mentira, no tabatin derechi pa sede nos podernan na Reino Hulandes (lesa Hulanda), meskos ta konta tambe pa tur ku a bai Hulanda bai firma.

Atrobe ta dos partido polítiko a bai urna. SI ku NO. Derechismo i kolonialnan a wòrdu kastigá i e partido derechista di mas grandi a wòrdu likidá na urna dor di pueblo votadó. Partido ku a ofres’é generosamente su servisionan i koperashon mas dediká pa mantené e status quo. MAN ta den posishon pa opta pa mas libertat i igualdat òf pa kontinuá bou di peso di leinan ku nos no por mishi kuné ni kambia sin un referèndem, pero ku lo sigui rigi nos bida, pa interes ku no ta di nos. MAN di bèrdat ta pertenesé na e ehérsito di mas libertat manera propagá òf nada lo no kambia despues di elekshon? Awor ta oportunidat pa mustra sinseridat.Pregunta ta, si esei ta posibel den un koalishon ku un partido ku semper a propagá mas intervenshon Hulandes den nos asuntunan?

Nos no a ripará ku e leinan aki despues di 10-10-10 a konbertí bario nan pober den ruina kaminda violensia i inseguridat ta reina? Esaki ta konsekuensia di benta honor i amor pa e baranka aki afó pa un saku di plaka. Un referèndem honesto ta e úniko medio pa lanta atrobe e konsenshi ku nos dignidat no tin preis.

Si no bin un referèndem limpi i nobo anto moveshon NO tin di korona su lucha ku e akto supremo i esei ta un lantamentu pa derechi. E gobièrnu ku sinta lo disidí esei. Palabra ta na bosnan!

Fundashon Kòrsou Fuerte I Outónomo

Mrs. Jose Eustatius, Eldon Peppie Sulvaran en Chester Peterson,

Curacao