WILLEMSTAD.- E sospechoso venezolano Yahn Lugo Vargas a wòrdu apsolvé mes ora di tur kulpa den e kaso atrako Castorwèg ayera. For di komienso e akusado a duna di konos’é ku e ta kompletamente inosente den e kaso aki.
El a splika ku e no tabata sa di nada ni nunka no a partisipá den niun atrako. Hues a duna di konos’é ku nan a interogá algun trahadó di hotèl kaminda e venezolanonan tabata keda, i nan a bisa ku tabatin dos yabi di kamber den sirkulashon.
Tambe nan a duna di konos’é ku tabatin vários hende ku tabata drenta sali e kamber. Mirando esaki hues a bisa ku no por kulpa Vargas di tin di haber ku e telefònnan pa motibu ku no tin sufisiente prueba pa ku esaki. Mirando tambe ku ta vários hende tabata hasi uzo di e kamber. Tambe hues a duna di konos’é ku e rapòrt di DNA a revelá ku no a haña niun rasgo di Vargas riba e artíkulonan ku a keda konfiská. Mirando esaki hues a duna di konosé ku no tin motibu pa sigui tene Vargas mas den aresto preventivo. E lo a keda mandá Barak pa despues e wòrdu deportá pa su pais. E akusado Calvenhoven a bisa hues ayera ku e no tin nada di aber ku e atrako. El a splika ku e dia ei el a bai pa hòrta kos nan di outo ora ku direpente el a mira polis a kore yega.
El a spanta i sali na kareda. Ora ku el a keda arestá el a keda straño dikon nan no a puntr’é nada di kosnan di outo. El a duna di konosé ku nan agredié sin motibu. Pa loke ta trata e otro akusado venezolano Villavicencio, el a bisa ku polisnan a gòlpi’é malamente durante su aresto. Segun Villavicencio, aworakí e ta sufriendo di basta doló di kabes i no ta hañando e tratamentu médiko nesesario den prizòn. Abogadonan di e akusado a pidi korte pa suspend’é nan klientenan te dia ku e kaso keda tratá. Hues despues di bai deliberá, a duna di konos’é ku tin kargonan pisá kontra e otro akusadonan Dovale, Villavicencio i Calvenhoven i ku pa aworakí nan mester keda será te dia e kaso wòrdu tratá den su kontenido.
Bron: Extra