WILLEMSTAD.- Dirigentenan di dos organisashon di taksista, esta Sinusta i 30 Steps a disidí ku awor ta basta i a deklará guera na un operador di tourbus ku nan ta yama pirata pa motibu ku e bende pakete di transporte entre hotèl i sentro di siudat, spesialmente ora tin eventonan speshal den Punda manera nochinan di kompra.

E organisashonnan di taksista a bin ta atvertí e operador di tourbus ku loke e ta hasi ta robes i ku nan ta bai tuma akshon. Tantu Rignald Paulina di 30 Steps komo Rignald Sling di Sinusta a bisa ku e operador a skucha pero a hasi kaso omiso di nan atvertensia pasobra djaweps último a bolbe bende pakete di transporte ku koperashon di gerensia di Sunscape.

Taksistanan a tuma lei den nan man i a para e bus i eksigí pa baha e turistanan. Un esena leu fo’i bunita i no e mihó propaganda pa turismo na Kòrsou. Nan no ke hasi kos mahos, sigur no dilanti di turistanan ku ta bishitando nos pais pero nan kana a yega e dirigentenan taksista ta bisa.

Dirigentenan di Sinusta i 30 Steps a papia ku outoridatnan, inkluso outoridatnan polisial pa motibu ku nan a komprondé ku e tourbus no ta sigurá i no ta di kùr. A atendé ku e situashon aki por poko ora despues e bus en kestion tabata transportando turista pa Erport Hato i aki nan a komprondé ku tin wega shushi i ku tin hende den gobièrnu i/o e aparato públiko ku ta yuda e operador pirata. E insidente di djaweps ta kulminashon i no ta bai aseptá nada mas, sigur no di poko strañero ku no ta respetá nos leinan ni nos hendenan i ku pa kolmo ta yama taksistanan un set di hende morto di hamber Rignald Sling a duna di konosé. Nan a papia ku minister Suzanne Camelia-Römer, promé ku esei ku minister Earl Balborda i ámbos mandatario a bisa ku taksistanan mester bai atendé e asuntu aki ku minister di hustisia.

Bron: Extra