WILLEMSTAD.- ‘Aresto di outornan intelektual di asesinato di Helmin Wiels lo ta e korona riba mi trabou komo minister di Hustisia.” Asina minister di Hustisia Nelson Navarro a splika. ‘Te ainda mi ta hopi optimista tokante esaki.
Mi ta spera ku Ministerio Públiko lo arestá e outornan intelektual pronto. Ministerio Públiko ta traha 24/7 pa resolbé e kaso. Nan ta hasi hopi bon trabou.” Segun Navarro ta importante ku Ministerio Públiko tin prueba ku ta kompletamente konvisente. ‘Nos ta papia tokante hende ku tin abogado hopi bon.”
Navarro ta spera ku den e lunanan próksimo lo mira aresto di e outornan intelektual. ‘Pa mi ta importante ku e kaso ta keda resolbé. Pasobra te ainda tin nubia pretu riba Kòrsou. Pa pueblo di Kòrsou mi ta spera ku e kaso lo keda resolbé lihé.”
Si Nelson Navarro wak bèk riba su kuater añanan komo minister di Hustisia e ta di opinion ku el a pone un fundeshi duru. ‘Awor tin klaridat tokante e direkshon ku nos mester bai ku e ministerio di Hustisia.
Tur nanishi ta den mesun direkshon. E diferente instansianan ku ta kai bou di e ministerio ta traha hopi bon ku otro. Nos mester sigui ku esaki.”
Navarro ta a splika ku den e último kuater añanan el a traha duru pa pueblo di Kòrsou. Pero e no tin niun intenshon pa bin bèk komo minister. ‘Si e partido tin e oportunidat pa goberná, i nan lo insistí, mi lo deliberá ku mi kasá promé ku mi ta tuma un desishon. Pero si bo ta puntra mi awor: mi no tin intenshon pa bin bèk komo minister.”
Bron: Extra