WILLEMSTAD.- E desishon di pone e hefe di “bedrijfsvoering” di duana riba non-aktif no a straña sindikato STrAF, pasobra nan tabata na altura di práktikanan di e hefe aki sr. Royston Paulina.
Pero tambe e sindikato a haña nan konfrontá ku e hefe aki durante nan akshon. Sr. Juan Lourens, presidente di sindikato STrAF a bisa EXTRA ku nan tambe a tuma nota dje desishon di minister di finansa pa pone Lourens riba nan-aktif. Novèmber aña pasá Paulina a drenta den duane i tabatin un aña di periodo di prueba. Despues ku e hefe di duana sr. Ilario a keda poné riba non-aktif, Paulina a tuma posishon ònbeskòp, i no ta respetá desishon di e persona poné na mando aktualmente ku ta sra. Pols.
Banda di esaki, e sindikato a hañ’é konfrontá ku Paulina, kende a bai pone preshon riba e persona di rekurso humano, pa bisa ken ta miembro di STrAF i ABVO na momentu ku e sindikatonan a pone reunion bou di ora di trabou, kaminda despues a bini e moshon kontra di e hefe di duana. Alabes STrAf ta na altura di algun kos ku Paulina lo a hasi di kual nan ta kere ku no ta korekto.
Entre tantu sindikato STrAF a reuní ku e komishon ku ta investigando henter e mal kontentu rondó di funshonamentu di e hefe di duana sr. Ilario, kende ta na kas.
Lourens a indiká ku na un okashon nan a sinta papia ku e komishon pa kasi dos ora largu i presentá tur dokumentonan relevante riba e maneho di Ilario.
Ainda e komishon no ta kla ku su investigashon, i a pidi un luna mas pa kaba e trabou
Bron: Extra